Grajqevci: Kosova e humbi hapin në hulumtimin e krimeve të luftës

Drejtuesi i Këshillit Koordinues për të zhdukurit dhe krimet e luftës, Ahmet Grajqevci, ka thënë se autoritetet kosovare nuk kanë bërë sa duhet për hulumtimin e të zhdukurve gjatë luftës, ndërsa ka shtuar se ka ngecje edhe në evidentimin dhe dënimin e kriminelëve.

Ai ka thënë të enjten në “60 Minuta” të KTV-së se Kosova e ka humbur hapin në dënimin e kriminelëve, duke theksuar se identifikimi i tyre ka marrë shumë kohë.

“Politikanët kanë ngecur që s’e kanë iniciuar procesin e identifikimit të krimeve të luftës me kohë. Ne e humbëm hapin, qe 25 vjet shumë pak aktakuza rreth krimeve të luftës... Rasti i masakrës te Jasharët është dashur të zbardhet i pari, ekspertizat mjekësore tregojnë se aty (në Prekaz) u bë krim. Dihet komplet urdhri komandues. Serbët kanë bërë kanibalizëm në familjen Jashari”, ka thënë Grajqevci.

Sipas tij, sulmi te Jasharët ka qenë lehtë i identifikueshëm pasi “janë ditur të gjitha”. Grajqevci ka theksuar se është problematik edhe mosbashkëpunimi i palës serbe në gjetjen e varrezave masive në Serbi.

Sipas tij, Serbia i di të gjitha masakrat.

“Tribunali i Hagës i ka bërë 400 vendmasakra që në bazë të proceseve kërkojnë hetime shtesë. Gjykata jonë s’është marrë me këtë çështje. Është e pakëndshme si për familjarët ashtu edhe për ne, s’është bërë sa duhet as nga ne. Askush s’na ka penguar që t’i hulumtojmë, por të gjithë e kanë dashur kolltukun. Në Kosovë janë rreth 22 gërmime, në 7-8 prej tyre ka pasur mbetje mortore, e në të tjerat s’janë gjetur...Sa i përket çështjeve të varrezave masive, Serbia s’është bashkëpunuese...Njerëzit tanë janë marrë të gjallë ose të vdekur, e dimë rrugëtimin e tyre, por s’e dimë vendndodhjen e tyre. Atë më mirë e di shteti kriminal serb”, ka shtuar drejtuesi i Këshillit për krimet e luftës.

Edhe Arbëri 3 muaj më parë Të vrarët në luftë kanë emra, por shteti s’i di

Grajqevci ka deklaruar se as Evropa duket se “nuk është e interesuar për zbardhjen e krimeve”, por vetëm për arritjen e pajtimit. Pajtimi, sipas tij, arrihet vetëm kur fajtori kërkon falje.

“Pajtimin se bëjmë ne, e bën fajtori duke kërkuar falje. Ne e falim ose jo. Ajo (Serbia) edhe të vret edhe s’të kërkon falje. Thotë ‘unë s’kam bërë asgjë’...Lajçaku (i dërguari i BE-së për dialogun v.j.)luan si të dojë, njerëzit tanë janë takuar edhe me Lajçakun që kjo çështje të jetë në rend të parë. Absolutisht s’ka dhënë asnjë shpresë, Evropa s’është e interesuar për personat e zhdukur”, ka theksuar ai.

Drejtuesi i Këshillit Koordinues për të zhdukurit ka shtuar se pasluftës UNMIK-u i kishte marrë dosjet që i dokumentonin krimet e Serbisë në Kosovë, por s’dihet nëse i ka kthyer.