-
Nga:
Ardona Popova
- 16 janar 2026 12:02
- Shpërndaje në:
Deputetët e Lëvizjes Vetëvendosje, Fitore Pacolli dhe Salih Zyba e kanë konfirmuar se do të paraqiten në seancën gjyqësore që do të mbahet sot.
Pacolli, Zyba së bashku me ministrin e Brendshëm në detyrë, Xhelal Sveçla, si dhe ish-deputetja Drita Millaku, akuzohen për “hedhje të gazit lotsjellës” në Kuvendin e Kosovës në vitin 2018.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoNdërkohë Sveçla nuk u është përgjigjur thirrjeve të KOHËS lidhur me pyetjen nëse do të marrë pjesë në seancën e sotme.
Në seancën e mbajtur më 31 tetor, gjyqtari Sabit Sadikaj pati paralajmëruar se kushdo që do të mungojë në seancë, ndaj tij do të lëshohet urdhërarrest, me kërkesë eventuale për paraburgim.
“Secila palë që mungon, ndaj asaj pale të lëshohet urdhërarrest dhe kërkesë për caktim të masës së paraburgimit eventual”, pati thënë gjyqtari Sadikaj.
Seanca pritet të nisë në orën 13:20.
Sipas aktakuzës së ngritur për rastin, më 21 mars të 2018-s, nga ora 12:10 e deri në 15:40, të tre të akuzuarit kanë ndezur disa bombola të gazit lotsjellës brenda sallës së Kuvendit, ku ka qenë duke u mbajtur seancë plenare lidhur me votimin e demarkacionit me Malin e Zi. Në aktakuzë thuhet po ashtu se si rrjedhojë e kësaj, të gjithë deputetët janë detyruar që ta lirojnë sallën e Kuvendit, me ç’rast është pamundësuar vazhdimin e seancës. Gazi lotsjellës është përdorur gjatë seancës së jashtëzakonshme.
Sveçla mungon në seancën për gazin lotsjellës, Gjykata veçon procedurën ndaj tij
Photo: Driton Paçarada
Gjykata ka marrë vendim që ta ndajë procedurën penale ndaj ministrit në detyrë të Punëve të Brendshme, Xhelal Sveçla, nga ajo e të pandehurve të tjerë në rastin e hedhjes së gazit lotsjellës në Kuvendin e Kosovës në mars të vitit 2018.
Ndërkohë, shqyrtimi gjyqësor ka vazhduar ndaj ish-deputetëve të Lëvizjes Vetëvendosje, Salih Zyba, Fitore Pacolli-Dalipi dhe Drita Millaku. Vendimi u mor pasi Sveçla nuk u paraqit as në seancën e sotme.
Gjyqtari i rastit, Sabit Sadikaj, bëri të ditur se i pandehuri e ka njoftuar gjykatën për mungesën e tij përmes emailit, duke sqaruar se ndodhet jashtë vendit. Sipas Sadikajt, janë përmbushur kushtet ligjore që shqyrtimi gjyqësor të vazhdojë vetëm me të pandehurit e pranishëm.
Ndërkohë, avokati i Sveçlës, Laur Preni, i kërkoi gjykatës mirëkuptim, duke theksuar se klienti i tij ushtron një funksion me përgjegjësi të lartë shtetërore.
“Kërkoj nga gjykata që të ketë konsideratë dhe mirëkuptim për faktin se i mbrojturi im mban një detyrë me përgjegjësi të lartë si ministër në detyrë i Punëve të Brendshme dhe jo çdo herë mund të jetë prezent apo i gatshëm që t’u përgjigjet ftesave nga gjykata”, tha ai.
I pandehuri Salih Zyba kërkoi që të ndërrohet prokurori i rastit, Valdrin Krasniqi, pasi hodhi dyshime se prokurori ka lidhje familjare me ish-sekretarin e Kuvendit.
“Apeloj te gjyqtari që të verifikohet në kohë reale që prokurori prezent të na heq dyshimet se i njëjti qenka i ndikuar nga prindi që ka mbajtur detyrën zyrtare në kohën sa është zhvilluar ajo seancë, zyrtari Ismet Krasniqi, është i biri natyral i Ismet Krasniqit, e konsideroj që është konflikt interesi dhe jo profesionalizëm. Së pari të verifikohet se i njëjti a është djali i sekretarit të atëhershëm", ka thënë ai.
