Gjatë reshjeve në fundjavë uji ka depërtuar në disa objekte në Malishevë

Malishevë, 9 korrik- Gjatë fundjavës, për shkak të reshjeve të shiut, në komunën e Malishevës është dashur të intervenohet në tri raste, ndërsa uji ka depërtuar nëpër disa objekte. Kjo u raportua sot në mbledhjen e Këshillit të Drejtorëve të kësaj komune.

Sipas drejtorit të Drejtorisë për Mbrojtje dhe Shpëtim, ekipet e zjarrfikësve kanë intervenuar për ta larguar ujin në shkollën e Gollubovcit, pastaj në një shtëpi në Plloçicë, si dhe në një rast në Mleçan, kanë ndërhyrë për shkak të zjarrit, ndërsa sipas njoftimeve uji ka depërtuar edhe në një shtëpi banimi në Tërpezë.