FSK-ja për herë të parë me dy ceremoni të ndara - një për Qeverinë e Parlamentin e tjetrën për Presidentin

12 vjet pasi Kosova ka shpallur shtetësinë e saj, ndasia mes institucioneve të Kosovës është bërë më e dukshme se çdoherë tjetër.

Ushtria e Kosovës është ajo që ka vënë në pah mospajtimet mes liderëve të institucioneve, raporton KTV.

Në mesditën e 12-vjetorit të Republikës, kryeministri Albin Kurti dhe kryeparlamentarja Vjosa Osmani për herë të parë, të veshur me epitetin e liderëve shtetërorë, u janë drejtuar ushtarakëve të Kosovës.

Aty sërish, për herën e parë, nuk ishte komandanti suprem i FSK-së, Hashim Thaçi, i cili ka rezervuar pasditen e 12-vjetorit për të vizituar ushtrinë.

Për Kurtin e Osmanin nuk pati rreshtim, por nga salla e sportit të kazermës “Adem Jashari” kryeministri Kurti i ka dërguar mesazh presidentit Thaçi.

Kurti ka kujtuar se Kosova është vend parlamentar dhe se institucionet e saja, si Parlamenti dhe Qeveria, zgjidhen direkt përmes votave të popullit dhe ato kanë të drejtën për të folur në emër të shtetit.

Kryeministri ka ritheksuar se do të punojë për unifikimin e politikës së jashtme, që për Kosovën të flitet njëzëri.

Ndërkaq ka shtuar se zbatimi i detyrueshëm i shërbimit ushtarak do të jetë investim në mbrojtje, por jo për të sulmuar ndokënd.

Kryeparlamentarja Vjosa Osmani ka theksuar se duke qenë bashkëshortja e një ushtaraku, e di vlerën dhe rëndësinë e uniformës.

Sipas saj, vendimi i ushtarëve për ta sakrifikuar veten në momentin kur e kanë veshur uniformën është i shenjtë, andaj ajo ka premtuar se anëtarësimi në NATO do të jetë mision i saj dhe i institucioneve të Kosovës.

Forca e Sigurisë e Kosovës mori misionin ushtarak më 14 dhjetor 2018 përmes ndryshimeve legjislative, pasi që ndryshimet kushtetuese ishin të pamundura për shkak të bllokimit që atë kohë e bënin deputetët e Listës Serbe.