Gjendja e komunitetit rom, ashkali dhe egjiptian është alarmante. Kështu u tha në një takim që Zëri i Romëve, Ashkalinjve dhe Egjiptianëve (VoRAE) dhe rrjeti KOSINT kanë mbajtur me deputetë të Kuvendit të Kosovës, rrjetin KOSINT dhe ambasadoren e Finlandës, Pia Stjernvall.
Isak Skenderi nga VoRAE, tha se ky takim ka për qëllim avokimin dhe integrimin, duke ditur situatën aktuale dhe gjendjen e margjinalizuar të komunitetit RAE.
“Sipas një raporti, 92 për qind e grave rome janë të papunësuara. Gjendja e komunitetit është alarmante. Qëllimi i këtij takimi është të zvogëlohet ai hendeku, e po ashtu të sigurohet një ambient i barabartë në Kosovë”, tha ai, raporton KsP.
Jehona Xhaferi nga KOSINT tha se organizatat që punojnë për komunitetin e romëve, ashkalinjve dhe egjiptianëve, tashmë janë bërë bashkë që të ndikojnë në avokimim e tyre.
“Unë besoj që në të ardhmen të punojmë në mënyrë edhe individuale, duke ditur se edhe ju jeni të zënë por vlen që edhe zëri juaj të dëgjohet”, u tha ajo deputeteve që ishin të pranishme në këtë takim.
Deputetja e Partisë Demokratike të Kosovës, Xhevahire Izmaku tha se roli i deputetëve është shumë i rëndësishëm, e madje edhe ua kanë borxh që të punojnë për këto komunitete.
Ajo tha se do të duhej që në këtë takim të ishin të pranishëm edhe përfaqësuesit e këtyre komuniteteve në Kuvendin e Kosovës.
Deputetja nga Alternativa, Mimoza Kusari- Lila tha se e vetmja pakicë në Kosovë që është trajtuar ndryshe është pakica serbe.
“Për ne, si grup, është e rëndësishme qe t'i kemi numrat, si për shembull, të të diplomuarve, ata që kanë braktisur shkollën, që të krijohet ideja se kah të shkohet, ne e kemi vullnetin që të ndihmojmë”, tha Kusari- Lila.
Deputetja e LDK-së, Vjosa Osmani, tha se përfaqësuesit e këtyre komuniteteve në Kuvendin e Kosovës duhet të jenë në këtë takim dhe të tregojnë se nga çka po pengohen, dhe çfarë janë kërkesat e tyre.
“Jemi në një fazë kur Kuvendi është jofunksional, jemi në një situatë kur brenda seancave plenare pak mund të diskutojmë, por në komisione mund të presim”, tha Osmani.