Leonard Ademaj, vëllai i Liridona Ademajt që u vra më 29 nëntor, është shprehur i kënaqur me mënyrën se si Prokuroria ka organizuar intervistimin e të dyshuarve për vrasjen dhe ka përsëritur se i beson plotësisht sistemit të drejtësisë.
30-vjeçarja Ademaj ishte vrarë në rrugën “Dalip Alshiqi” në Prishtinë. Rasti pati tronditur opinionin, pasi fillimisht u raportua se bëhej fjalë për “grabitje me pasoja të vrasjes” e më pas si i dyshuar u arrestua edhe bashkëshorti i saj, Naim Murseli, nën dyshimin se ka organizuar vrasjen. Për rastin janë arrestuar katër persona. Të mërkurën, Murseli dha dëshminë para Prokurorisë. Sipas avokates së tij, Teuta Zhinipotoku, Murseli ka thënë se bëhet fjalë për diçka krejtësisht ndryshe nga ajo që është publikuar në rrjetet e informimit e ato sociale.
Në një njoftim në Facebook, vëllai i viktimës ka thënë se avokati i familjes ka marrë pjesë gjatë intervistimit të të dyshuarve. Ai ka thënë se nuk mund ta komentojnë përmbajtjen e deklaratave por ka shprehur besim në Prokurorinë e shtetit.
“Për të respektuar në plotni sekretin hetimor dhe proceduren penale, ne nuk do të komentojmë përmbajtjen e deklarimeve. Mirëpo, duam ta përmendim që jemi të kënaqur me mënyrën se si prokurorja ka organizuar intervistimin e tyre dhe kemi besim të plotë në të. Drejtësia duhet dhe do të triumfojë, për Liridonën tonë dhe për të gjitha gratë dhe vajzat e vrara”, ka shkruar ai.
Liridona Ademaj ishte varrosur fillimisht në fshatin Cërmjan të Gjakovës, prej nga vjen bashkëshorti i saj. Por pas arrestimit të tij familja kërkoi zhvarrimin dhe e rivarrosi në fshatin ku u lind e rrit – Rracaj.