Sot është dita e fundit që partitë politike t’i deklarojnë koalicionet parazgjedhore.
Por, ndonëse kanë mbetur edhe pak orë deri në mbylljen e afatit, asnjë nga subjektet e mëdha politike nuk ka bërë ndonjë marrëveshje.
Hekuran Murati nga Lëvizja Vetëvendosje ka thënë se do të vazhdojë bashkëpunimi me Listën Guxo dhe Alternativën.
Të gatshëm për koalicione u shprehën edhe në Partinë Demokratike, subjekt i cili synon krijimin e një blloku të gjerë që do të mundësonte formimin e qeverisë së ardhshme me Bedri Hamzën kryeministër.
Por, në PDK thanë se lista e kandidatëve do bëhet nën emrin e partisë.
Edhe në Lidhjen Demokratike e rikonfirmuan se pavarësisht se kush do bashkëpunim me ta, duhet të pajtohet që të garojë nën siglën e LDK-së.
Deri tash AAK-ja është zotuar se do t’i hyjë garës e vetme, pa koalicione me partitë e tjera.
Për zgjedhjet e parakohshme të 28 dhjetorit, vetëm dy koalicione të partive të vogla nga radhët e komuniteteve janë deklaruar në KQZ.
Sipas KQZ-së, për zgjedhjet e parakohshme të 28 dhjetorit janë bërë bashkë disa nga parti të komuniteteve, por jo edhe subjektet e mëdha shqiptare.
“Zyra për Regjistrim, Certifikim dhe Kontrollin Financiar të Subjekteve Politike është njoftuar për formimin e dy koalicioneve për pjesëmarrje në zgjedhje, si në vijim: ‘PAI-PDAK-LPB’, i përbërë nga 3 parti politike: Partia e Ashkalinjve për Integrim (PAI), Partia Demokratike e Ashkalinjve të Kosovës (PDAK) dhe Lëvizja për Bashkëveprim (LPB); dhe Koalicioni VAKAT, i përbërë nga 3 parti politike: Demokratska Stranka Bošnjaka (DSB), Bošnjačka Stranka Kosova (BSK) dhe Demokratska Stranka Vatan (DSV)”, ka bërë të ditur KQZ-ja.
Deri më tash, partitë kryesore kanë preferuar që në vend të koalicioneve, t’i shkrijnë në lista të tyre partnerë më të vegjël.