Bora ka shndërruar disa rrugë të Prishtinës në ngrica, madje si pasojë kanë ardhur edhe aksidentet e shumta.
Koha.net edhe pak më parë ka raportuar për disa aksidente “Te Qafa” dhe në Mati 1.
Ndërkohë, nga vendi i ngjarjes në rrugën “B” kemi siguruar edhe fotografi dhe video ku shihen një numër i madh i veturave, që nga akulli i krijuar në rrugë, veturat rrëshqasin dhe është krijuar tollovi.
Koha.net ka kontaktuar me zëdhënësen e Komunës së Prishtinës, Miranda Mullafazliu, e cila ka thënë se kjo tollovi e veturave ka ardhur pasi shumica e qytetarëve kanë ndërruar gomat e veturave.
Ajo ka treguar se që nga 15 marsi, qytetarët kanë qenë të obliguar të ndërrojnë gomat e dimrit.
Megjithatë, Mullafazliu ka shtuar se Komuna është duke ndërmarrë hapat e nevojshëm.
“Janë 6 kompani të cilat i kemi në terren, edhe në qendër edhe në vende rurale. Jemi vazhdimisht duke punuar, por borë po bie kohë pas kohe, dhe kjo sigurisht e bënë të pamundur të pastrohet e tërë bora përnjëherë. Megjithëse, nga 15 marsi qytetarët kanë ndërruar gomat e dimrit, dhe sigurisht kjo është një arsye plus që po krijohet tollovia dhe ka rrëshqitje të veturave. Por, pak më herët mora informacione se në shumë rrugë janë duke u vendosur edhe guraleca, për të shpërfillur rrëshqitjet”, tha Mullafazliu për Koha.net.
Edhe
Dhjetëra aksidente në rrugën “B”, shkak ngricat
Kujtojmë se më 15 mars ka përfunduar sezoni dimëror për automjetet në trafikun dimëror.
Nga 15 nëntori e deri atë ditë, automjetet dhe bashkësitë e mjeteve që kanë marrë pjesë në trafikun rrugor është dashur t’i kenë pajisjet dimërore. Ndërsa pas 15 marsit pjesëmarrësit në trafik nuk mund të dënohen nëse nuk i kanë këto pajisje.
Dënimet për mungesë të pajisjeve dimërore kanë qenë prej 40-300 euro.
