Megjithëse ekziston Ligjit për Kontrollin e Duhanit, që nga viti 2013, zbatimi i tij ende është problematik.
Pirja e duhanit në ambiente të mbyllura, që ndalohet me këtë ligj, bëhet vazhdimisht e kjo sidomos në komuna tjera pos kryeqytetit.
Për këtë, deputeti i Vetëvendosjes, Dimal Basha, thotë se mori iniciativën që të nisë bashkëpunimin me biznese të ndryshme në Ferizaj, që të ndalohet pirja e duhanit, raporton KTV.
Këtë, ai po synon ta bëjë që nga 1 marsi, e thotë se shumë biznese e kanë përkrahur.
Sipas tij, shtimi i numrit të inspektorëve do të ndihmonte që Ligji për duhanin të respektohej në të gjithë vendin.
Bizneset në Ferizaj e kanë mirëpritur këtë iniciativë.
Edhe në Komunën e Ferizajt e pranojnë që gjendja nuk është e mirë sa i përket respektimit të këtij ligji.
Mbikëqyrjen e zbatimit të Ligjit për Kontrollin e Duhanit, e bëjnë inspektorët qendrorë dhe komunalë.
