Deputeti i VV-së skeptik se Projektkodi Civil do të shkojë në Kuvend këtë legjislaturë

Nasuf Bejta, deputet i Lëvizjes Vetëvendosje dhe anëtar i Komisionit për të drejtat e njeriut dhe barazi gjinore, është shprehur tejet skeptik se Projektkodi Civil do të shkojë për votim në Kuvendin e Kosovës gjatë kësaj legjislature.

Projektkodi Civil ka dështuar të miratohet në Kuvend pasi nuk ka marrë përkrahjen e disa prej deputetëve të pushtetit. Shkak është bërë pika e dytë e nenit 1138, që lejon bashkësitë civile mes personave të gjinisë së njëjtë. Pavarësisht përpjekjeve, ende s’ka dakordim.

Sipas Bejtas, organet e Lëvizjes Vetëvendosje janë duke diskutuar për këtë çështje me deputetët kundërshtues.

“Organet e partisë janë në debat për këtë çështje. Ka kohë të bisedohet, të debatohet për disa deputetë që kanë mendim tjetër. Frikën e kam që nuk do të vijë në Kuvend në këtë legjislaturë”, ka thënë ai në “60 Minuta” të KTV-së.

Por vetë Bejta, që vjen nga radhët e Listës GUXO, ka thënë se personalisht nuk është kundër Projektkodit Civil dhe ligjit për shëndetin riprodhues, që dje sërish dështoi të miratohej në Kuvend.

“Unë e kam votuar edhe Projektkodin Civil dhe fertilitetin artificial. Unë atë çka bien në ujdi Komisioni parlamentar, do ta votoj. E di që punë ideale ka. Ne si deputet e kemi obligim t’i çojmë përpara disa çështje. Ka disa gjëra që nuk më pëlqejnë, por si deputet nuk duhet të shkelim të drejtat e askujt. Nuk jemi shteti i vetëm që do të lejojmë martesat e gjinisë së njëjtë. Duhet t’i japim kahe kësaj çështje. Është e drejtë e një komuniteti. Nëse mua si individ ka disa nene që nuk më pëlqejnë, nuk do të thotë që t’ia mohoj dikujt tjetër”, ka shtuar deputeti.

Edhe Arbëri 13 tet 2024 Kritikohet draftligji për shëndetësi, shkaku i vonesave vlerësohet se s’ka shpresë të kalojë në Kuvend

Bejta ka thënë se nëse ekspertët mjekësorë rekomandojnë miratimin e një ligji, atëherë është “punë e kryer”.

“Unë jam i diplomuar në inxhinieri dhe nëse ekspertët mjekësorë në atë Komision thonë se një ligj i tillë [për shëndetin riprodhues] duhet të kalojë, unë s’kam çka të them”, ka deklaruar ai.