-
Nga:
Donisa Fazliu
- 31 korrik 2025 10:32
- Shpërndaje në:
Është dënuar me 15 vjet burgim Millosh Pleskoviq i akuzuar për krime lufte.
Pleskoviq akuzohet se gjatë vitit 1998-99 në Prizren në bashkëkryerje me një grup serbësh të armatosur kishin vrarë tre civilë shqiptarë dhe plagosur disa të tjerë.
Sipas aktakuzës së Prokurorisë Speciale e ngritur më 7 qershor 2024, Millosh Pleskoviq gjatë vitit 1998-99 në Prizren, në bashkëkryerje me persona të tjerë, ka shkelur rregullat e së drejtës ndërkombëtare kundër personave civilë, duke kryer vrasjen e viktimave.
VIDEO:
Deklarata e nënës së viktimave:
Deklarata e avokatit:
Nëna e binjakëve të vrarë nga Pleskoviqi: Duhet të dënohet përjetë
Photo: Driton Paçarada
E ëma e Binak dhe Reshat Dacit, dy viktimave të vrara nga Millosh Pleskoviq gjatë luftës, ka thënë se dënimi prej 15 vjetësh për të, është shumë i ulët.
Pas shpalljes së aktgjykimit të Gjykatës Themelore në Prishtinë të enjten, ajo ka thënë se ky dënim duhet të jetë i përjetshëm.
“M’i ka vrarë dy djem Milloshi, nga 29 vjet i kanë pasur. 15 vjet kurgjë nuk janë, janë shumë pak, ai duhet të dënohet përjetë”, ka thënë ajo para gazetarëve.
E motra e binjakëve të vrarë gjatë luftës, Ganimete Daçaj, ka thënë se dënimi për Pleskoviqin nuk është meritor.
“Ata duhet përjetë, ai po paraqitet që s’i kanë gjuajt vëllaznitë e mi. Ai Milloshi është. Ai mi ka masakru vëllaznit. Pak asht ajo, shumë duhet, jo vetëm ai, krejtve. Ai i ka mbytë krejt. Nuk janë vetëm vëllaznit e mi, nëna ime që sa vjet është t’u kajtë. Duhet shumë. Pak asht drejtësia, nuk është në nivel, duhet më shumë”, ka thënë ajo.
Avokati Gjini: Pleskoviqi ishte pjesëtar i Beretave të Kuqe, duhet dënim i përjetshëm
Photo: Driton Paçarada
Avokati i palës së dëmtuar, Gent Gjini ka thënë se nga provat shihet se Pleskoviqi ka qenë pjesëtar i Beretave të Kuqe (Njësia për Operacione Speciale e Serbisë), andaj dënimi ndaj tij duhet të jetë maksimal.
Sipas Gjinit, dënimi prej 15 vjetësh është diskriminues për të gjitha familjet e viktimave të luftës.
“Si avokat i palës së dëmtuar dua të them se është gjykuar një kriminel lufte me ligjet e ish- Jugosllavisë paramendojeni. Tribunali i Hagës paraqet dënime maksimale, ndërsa ky dënim është shumë pak në raport me rrethanat e masakrën që e ka bërë, zonjës ia ka masakruar dy fëmijët binjakë dhe janë faktet se si ua ka prerë gjymtyrët. E gjykata t’i dënojë me 15 vjet, me ligj të ish-Jugosllavisë, ky është diskriminim. Hera e parë që po dënohet një pjesëtar i Arkanoviqëve, i Beretave të Kuqe që kanë bërë krim. Ne do të bëjmë ankesë e ndoshta do të shkojmë edhe në Tribunal të Hagës të marrim jurisprudencë dhe praktikën gjyqësore se sa janë dënuar kriminelët e luftës jugosllave me Bereta të Kuqe, ku atje janë dënuar me dënim maksimal, të përjetshëm, ndërsa këtu dënohen me 15 vjet burgim, kjo është absurde”, ka thënë ai.