Dëmtohen shenjat e komunikacionit në Ferizaj, ish-deputeti Tahiri ankohet për mosmirëmbajtje

Qytetarët e Ferizajt janë ankuar se shenjat e komunikacionit të dëmtuara gjatë periudhës së fundit kohore nuk po rregullohen nga askush.

Qytetarët madje kanë dërguar edhe fotografi rreth kësaj çështje derisa shenjat janë dëmtuar në rrugën tek rrethrrotullimi afër Kazermës së FSK-së në Ferizaj dhe në drejtim të fshatit Nerodime, raporton "Koha Ditore".

Rreth kësaj çështje gjatë së martës nëpërmjet një postimi në Facebook, ka reaguar edhe ish-deputeti i Kuvendit të Kosovës nga Ferizaj, Labinot Tahiri.

“Përgjegjësit e rrugëve apo shenjave për këmbësorët dhe të veturave, ju lutemi të dilni e t’i ndërroni këto shenja dhe dilni më shpesh kontrolloni sepse do ua postoj për çdo ditë. Një ditë apo dy lejohen, ama një javë jo”, ka shkruar midis të tjerash Tahiri, duke shpjeguar se tabelat janë dëmtuar te rrethrrotullimi i Kazermës Ushtarake në rrugën Koshare-Ferizaj dhe në Nerodime në drejtim të Bifurkacionit.