(Lajm i përditësuar) - Duke u thirrur në rezultatin e dobët zgjedhor dega e Lidhjes Demokratike të Kosovës (LDK) në Pejë, ajo në Lipjan si dhe dega e dytë e LDK-së në Prishtinë kanë kërkuar dorëheqjen e kryetarit të kësaj partie Lumir Abdixhiku.
Dega LDK-së në Pejë, ka njoftuar se ka mbajtur mbledhjen e kryesisë dhe me shumicë votash kanë kërkuar nga lidershipi i LDK-së, të jap dorëheqje si akt moral, gjegjësisht nga kryetari Lumir Abdixhiku.
Në njoftimin e degës së LDK-së në Pejë, thuhet se kanë vlerësuar që përgjegjësia për rezultatin duhet të bartet nga udhëheqja.
Lidhja Demokratike e Kosovës në këto zgjedhje është radhitur sërish e treta me 16.69% të votave.
“Pas mbledhjes së Kryesisë dhe analizës së rezultateve të zgjedhjeve të qershorit, me shumicë votash, anëtarët e Kryesisë në Pejë kanë kërkuar reflektim të thellë politik dhe marrjen e përgjegjësisë nga lidershipi i partisë. Në këtë drejtim, është kërkuar dorëheqja si akt moral dhe politik, duke vlerësuar se përgjegjësia për rezultatin duhet të bartet nga udhëheqja”, thuhet në postimin në Facebook.
Edhe kryesia e degës së LDK-së në Lipjan ka mbajtur një mbledhje me kryetarët e nëndegëve për të diskutuar për rezultatin e zgjedhjeve të 7 qershorit me ç’rast edhe kjo degë po kërkon dorëheqjen e kryetarit Lumir Abdixhiku.
“Në këtë frymë, pas një diskutimi të gjatë dhe një analize të detajuar të secilës qendër votimi në Degën e Lipjanit, si dhe të gjendjes aktuale politike dhe organizative brenda Lidhjes Demokratike të Kosovës, Kryesia e Degës kërkon dorëheqjen e Kryetarit të LDK-së, si standard të përgjegjësisë politike dhe si akt reflektimi ndaj mesazhit që qytetarët kanë përcjellë përmes votës së tyre”, thuhet mes tjerash në postimin e kësaj dege në Facebook.
Kjo kërkesë e degës së LDK-së në Pejë dhe Lipjan për dorëheqjen e Abdixhikut është shpërndarë nga Arben Gashi i cili ka siguruar votat për të qenë deputet i legjislaturës së 11-të nga radhët e kësaj partie.
Ndërkohë në deklaratën e degës së dytë të LDK-së në Prishtinë, thuhet se partia po kalon një nga periudhat më të vështira në histori.
“Fatkeqësisht, ashtu si Kosova, edhe Lidhja Demokratike e Kosovës po kalon njërën nga periudhat më të vështira në historinë e saj. Pas humbjeve të njëpasnjëshme, LDK-ja po rrëshqet drejt margjinalizimit politik, duke e betonuar veten në pozitën e tretë dhe duke u shndërruar në një parti pa peshën e duhur politike dhe shtetndërtuese. Ky është një realitet i papranueshëm për partinë e Ibrahim Rugovës dhe një dëm i madh për vetë shtetin e Kosovës”, thuhet në deklaratën e publikuar në Facebook.
Në deklaratë thuhet se kjo situatë kërkon reflektim të thellë, përgjegjësi politike dhe vendime të guximshme.
“Në këtë moment, askush nuk duhet ta përjashtojë veten nga përgjegjësia. Të gjithë duhet të jemi të gatshëm të japim llogari para anëtarësisë dhe qytetarëve: kryetari, kryesia, degët dhe nëndegët. Megjithatë, adresa kryesore e humbjes së tri palë zgjedhjeve të fundit dihet qartë dhe saktë. Prandaj, në këtë situatë kërkohen kurajë, veprim dhe guxim për ta rikthyer fuqinë dhe peshën e LDK-së”, thuhet në deklaratë. “Në këto rrethana, Dega e Dytë e LDK-së në Prishtinë e falënderon kryetarin Lumir Abdixhiku për kontributin dhe angazhimin e tij të deritashëm dhe, njëkohësisht, kërkon që, me përgjegjësi dhe dinjitet politik, të japë dorëheqje dhe t’u hapë rrugë ndryshimeve tashmë të domosdoshme në LDK”, thuhet tuje në deklaratë.
Kica-Xhelili bën thirrje për unitet: LDK-ja s’është pronë as e kryetarit, as e degëve
Doarsa Kica-Xhelili
Photo: Driton Paçarada
Nënkryetarja e Lidhjes Demokratike të Kosovës Doarsa Kica-Xhelili, pas kërkesës së tri degëve të partisë për dorëheqjes të kryetarit Lumir Abdixhiku ka bërë thirrje për unitet.
“Ju bëj thirrje për unitet! Për unitet të sinqertë. Për unitet të përgjegjshëm. Për unitet që nuk e mohon debatin, por nuk lejon që debati ta kthejë LDK-në në përçarje”, ka shkruar Kica-Xhelili në Facebook.
Ajo ka thënë se LDK-ja nuk është pronë e askujt. “As e kryetarit. As e degëve. As e atyre që, në përballjen tonë me pushtetin, kritikonin vetëm LDK-në. LDK-ja është shtëpi politike. E në momente të ndjeshme, shtëpia nuk rrënohet pse ka nevojë për riparim. Ajo forcohet. Po, rezultati kërkon reflektim. Por reflektimi duhet të na bashkojë, jo të na copëtojë. Fundja, përgjegjësi kemi të gjithë, njësoj!”, ka shkruar Kica-Xhelili.
Ajo ka thënë se sot Kosova është në krizë institucionale, politike dhe të jashtme dhe ka bërë thirrje që LDK-ja të ruhet nga përçarjet.
“Në këtë moment, vendit i duhet një LDK e qartë, e fortë dhe e përgjegjshme. Jo një LDK e futur në përplasje publike, ku secili flet për moral, por pak kush e nis përgjegjësinë nga vetja. Prandaj, të flasim. Të përmirësohemi. Por ta ruajmë LDK-në. Ta ruajmë nga përçarja. Ta ruajmë nga kalkulimet e ngushta. Ta ruajmë nga tundimi për ta dobësuar në momentin kur ajo duhet të jetë adresë e stabilitetit për Kosovën”, ka shkruar Kica-Xhelili.
Ajo ka thënë se Abdixhiku në janar iu nënshtrua Kuvendit të partisë dhe mori votëbesimin e delegatëve.
“Kjo nuk e mbyll debatin përgjithmonë, por e përcakton rrugën: debati kryhet brenda. LDK-ja duhet të mbrohet sidomos kur është më e ekspozuar. Sepse ata që duan ta dobësojnë, nuk presin moment të qetë. Prandaj, ju ftoj për unitet. Vetëm bashkë e të matur i bëjmë nder tre shkronjave historike që përfaqësojmë. Mos harroni: LDK ka qenë dhe do të mbetet vetë Republika e Kosovës! Ta trajtojmë si të tillë!”, ka shkruar Kica-Xhelili.
Duke u thirrur në rezultatin e dobët zgjedhor, të martën dega e Lidhjes Demokratike të Kosovës (LDK) në Pejë, ajo në Lipjan si dhe dega e dytë e LDK-së në Prishtinë kanë kërkuar dorëheqjen e kryetarit të kësaj partie Lumir Abdixhiku.
Abdixhiku u përgjigjet Muhaxherit e Ahmetit: Pres dorëheqjen tuaj morale
Kryetari i Lidhjes Demokratike të Kosovës, Lumir Abdixhiku, u është përgjigjur kërkesës së degëve në Pejë dhe Lipjan për dorëheqjen e tij. Abdixhiku ka thënë se LDK-ja ka performuar më së dobëti në këto dy komuna në zgjedhjet e 7 qershorit dhe ka kërkuar dorëheqjen e tyre morale.
Abdixhiku këtë kërkesë e ka bërë ndaj kryetarit të degës në Pejë, Gazmend Muhaxheri dhe atij në Lipjan, Imri Ahmeti.
“Pajtohem që rezultati në këto dy degë nuk është i kënaqshëm. Në komuna ku kemi qeverisje, të dalim të tretët tregon vetëm dozën e një sabotimi të thellë dhe të një projekti që nuk është i LDK-së. Unë çështjen e dorëheqjes sime e kam trajtuar në Kuvendin e 31 janarit. Edhe përballë këtyre dy kryetarëve. Anëtarësia jonë, për mua, ka folur qartë. Por, për performancën e dobët në këto dy degë, rezultatin më të ulët ndër vite, pres dorëheqjet morale të dy kryetarëve në fjalë. I pranoj menjëherë”, ka thënë Abdixhiku në reagimin e tij në Facebook.
Abdixhiku ka thënë gjithashtu se këto kërkesa të dy kryetarëve, janë të koordinuara dhe e ka quajtur si më korrekte po t’i bëheshin ballë për ballë.
Kryetari i LDK-së ka deklaruar se ndjen keqardhje që në momentet me të rëndësishme kësaj partie, dëmtimi nga brenda mbetet qëllim. Reagimin e ka nisur dhe përfunduar me “Si nuk u ngopën kurrë?!”.
Abdixhiku fton anëtarësinë e LDK-së për durim: Kam marrë mbështetje nga kryetarë e nënkryetarë
Abdixhiku ka reaguar edhe njëherë pas këtij statusi ku ka ftuar anëtarësinë e LDK-së për durim.
“E kuptoj se anëtarësia jonë është e shqetësuar. Por sonte ju ftoj në durim. Ka momente kur padrejtësia duket më e madhe se mundi ynë; por janë pikërisht ato momente që e provojnë karakterin tonë. Ky karakter do t’i tejkalojë llogaritë e vogla; siç i ka tejkaluar gjithherë”, ka shkruar ai.
Abdixhiku ka thënë se ka marrë mesazhe mbështetëse nga kryetarë e nënkryetarë të degëve e veprimtarë, siç ka thënë, të pafund.
“Falënderoj, nga zemra, të gjithë kryetarët e degëve, kryetarët e nëndegëve dhe gjithë ata veprimtarë të pafund, për mbështetjen e dhënë sonte. Mesazhet e juaja mbështetëse, publike e private, janë më shumë se çfarë mund të kërkoj unë dhe LDK. Të gjithë ne, jemi veçse kalimtarë në një mision shumë më fisnik; por kur rrugën se bëjmë vet, ndihemi vërtetë më njerëzisht”, ka shkruar Abdixhiku.