Bordi i ardhshëm i SHSKUK-së në pritje të opinionit të Agjencisë Kundërkorrupsion

Ndonëse konkursi për drejtor të SHSKUK-së është shpallur e nga java e ardhshme nis rrjedhja e afatit për dorëzim të dokumenteve, ky proces mund të stopohet nëse Qeveria e Kosovës nuk e voton Bordin e ri të këtij institucioni. Ministri Vitia ka thënë se ky proces është vonuar, meqë janë në pritje të një opinioni nga Agjencia Kundër Korrupsion, për të parë nëse njëri kandidat i propozuar ka ose jo konflikt interesi për të mbajtur këtë pozitë

Qendra më e madhe spitalore publike në vend – Shërbimi Spitalor Klinik Universitar i Kosovës ka pothuajse 9 muaj që udhëhiqet me ushtrues detyre. Deri tani janë ndërruar dy sosh.

Prej javës së ardhshme kandidatët e interesuar për këtë pozitë kanë një javë afat që t’i dorëzojnë dokumentet.

Kriteret janë pothuajse të njëjta me ato të konkurseve të kaluara në këtë institucion. Kandidatët mund të jenë mjekë, ekonomistë ose juristë.

Megjithatë, zgjedhja e drejtorit do të varet nga Bordi i SHSKUK-së. E ky bord ka rreth një muaj që është jofunksional.

Ministri i Shëndetësisë, Arben Vitia, ka thënë se emërimi i Bordit të ri të SHSKUK-së nuk ka përfunduar, pasi është kërkuar interpretim për konflikt interesi për njërin nga të propozuarit për anëtar.

“Procesi realisht është para përfundimit. Një nga anëtarët e bordit të cilin ne e kemi propozuar. Po presim tash nga organet relevante, konkretisht nga Agjencia Antikorrupsion, nëse ka konflikt interesi ose jo...dhe sapo të kthehet, këtë e kemi dërguar para një kohe dhe sapo të kthehet përgjigjja do të procedohet”, tha tash Vitia.

Ai ka thënë se këtë opinion e kanë kërkuar nga Agjencia Kundër Korrupsionit, meqë emri i propozuar është zyrtar i lartë, por nuk e ka zbuluar identitetin e tij. KOHA ka mësuar se bëhet fjalë për sekretarin e Ministrisë së Shëndetësisë, Naim Bardiqi.

SHSKUK-ja nuk ka drejtor prej korrikut të vitit të kaluar. Asokohe, drejtori i atëhershëm Valbon Krasniqi ishte dorëhequr pas paralajmërimit për shkarkimin e tij.

Ministria e Shëndetësisë ka me shumë se dy vjet që udhëhiqet nga njerëz të propozuar nga ose të Vetëvendosjes.

Për dy vjet nuk është zgjedhur as kryeshefi i Agjencisë së Barnave. Në fakt, ky institucion është pa kryeshef qe rreth 5 vjet. Janë ndërruar disa herë disa ushtrues të detyrës.

Ministri Vitia ka deklaruar që edhe për këtë pozitë konkursi është në proces.

“Është deklaruar edhe konkursi për kryeshef të AKPM-së”, tha Vitia.

Shumica e institucioneve kryesore shëndetësore tash e dy vjet gati janë me ushtrues detyre. Në këtë periudhë edhe pozita e ministrit për rreth 6 muaj ishte me ushtrues detyre, e edhe ajo e drejtorit të SHSKUK-së. Me ushtrues detyre është edhe Fondi i Sigurimit Shëndetësor.