Bordi i AKK-së do që Kurti t’u kërkojë falje kryetarëve të komunave

Bordi i Asociacionit të Komunave të Kosovës, ka reaguar ndaj deklaratave të kryeministrit të Kosovës Albin Kurti, i cili tha se kryetarët e komunave po bëjnë politikë anti-shtetërore duke bojkotuar dorëzimin e listave të punëtorëve që janë në grevë.

Ai ka konsideruar se është “fyerje t’i cilësosh kryetarët e komunave si anti shtetit të Kosovës”.

“Kjo qasje për ne nuk është qasje që i duhet vendit tonë as momentumit, aq më tepër qasje që polarizon panevojshëm shoqërinë tonë. Po ashtu ju rikujtojmë që punëdhënës i punëtorëve komunalë është Komuna dhe jo Qeveria kurse Ministria e Financave vetëm proceson pagesat sepse vendimmarrës për buxhetet komunale janë vetë komunat”, thuhet në reagimin e bordit në Facebook.

“Nuk ka asnjë logjikë që një njeri që ka luftuar për vendin e vetë të punojë kundër shtetit. Kryetarët e Komunave vetëm po kërkojnë ligjshmëri dhe funksionim të ndarë mes niveleve të qeverisjes në Kosovë në harmoni me Kushtetutën”.

Bordi i AKK-së i ka kërkuar Kurtit që si obligim moral dhe institucional, t’u kërkojë falje kryetarëve dhe të mos “nxit edhe situata të tjera” që nuk janë përgjegjësi e kryetarëve.