Berisha thotë se rruga e Kosovës është integrimi në Nato

Ministri i FSK-së Rrustem Berisha tha se synimi i Kosovës është anëtarësimi në iniciativat rajonale, me theks të veçantë anëtarësimi i plotë në A5, forum ky i cili i kontribuon paqes, stabilitetit dhe integrimeve euroatlantike në rajon.

Berisha duke folur në konferencën SHBA –Karta e Adriatikut, që po mbahet në Budvë të Malit të Zi tha rruga e Kosovës për të ardhmen është e qartë dhe integrimi në NATO është qëllimi përfundimtar, transmeton KP.

“Republika e Kosovës mbetet thellësisht e angazhuar dhe e përkushtuar për bashkëpunim rajonal dhe një fqinjësi të mirë me të gjitha shtetet e rajonit. Konsiderojmë që ky bashkëpunim është jetik për të arritur paqe, stabilitet të qëndrueshëm dhe zhvillim të mëtejmë të kapaciteteve tona”, ka thënë ai.

Berisha ka folur edhe lidhur me pakënaqësitë e përfaqësuesve nga Serbia në këtë forum rreth prezencës së uniformës ushtarake të Kosovës.

Berisha tha se nuk duan t’i kthehen gjuhës mesjetare të konflikteve, “por do të flasim me gjuhën e integrimeve, gjuhën evropiane dhe gjuhën e një realiteti të ri në rajon, si interes i përbashkët për paqe dhe stabilitet”.

Berisha në punimet e konferencës së ministrave të Mbrojtjes në kuadër të iniciativës SHBA – Karta e Adriatikut, zhvilloi takim dypalësh edhe me sekretarin e Shtetit në Ministrinë e Mbrojtjes të Republikës së Sllovenisë, Millosh Bizjak.