Beqaj: Pasojat nga dështimi i marrëveshjes VV-LDK më të mëdha se sa përfitimet

Në një intervistë për portalin Koha.net, analisti Belul Beqaj, thotë se negociatat e deritashme ndërmjet Vetëvendosjes dhe LDK-së, do të prodhojnë zhgënjim.

"Pasojat nga dështimi i marrëveshjes do të jenë shumëfishë më të mëdha se sa përfitimet nga marrëveshja", shprehet Beqaj.

Sipas tij, kjo situatë lëvizë nga përpjekja e LDK-së për vazhdimin e shtetit të kapur te moskuptimi i Albin Kurtit për rëndësinë e pushtetit dhe pengesat reale.

Takimet e deritashme ndërmjet këtyre dy subjekteve, Beqaj i konsideron “kopje e zbehtë e pushteteve të kapura”.

Koha.net: Z.Beqa, kanë mbet edhe një javë afat kushtetues brenda të cilit z.Kurti duhet të arrijë një marrëveshje me LDK-në. Takimi i mbrëmshëm nuk prodhoi rezultat. Nëse nuk kanë arrit të merren vesh për afro tre muaj, a mund të ndodh kjo për një javë?

Beqaj: S`do mend se shpresa e premtuar po shndërrohet në zhgënjim. Edhe nëse arrihet marrëveshja, epilogu i saj, sipas mënyrës se si janë zhvilluar bisedimet e deritanishme, nuk do të jetë i qëndrueshëm dhe afatgjatë. Dorën në zemër, takimet e deritanishme ishin kopje e zbehtë e pushteteve të kapura, të motivuara nga LDK-ja!

Koha.net: Ky ngërç a është simptomë e paaftësisë së subjekteve politike për të ofruar zgjidhje? Prezenca e disa shteteve të Quintit dhe e përfaqësueses së BE-së në këtë takim krijon një situatë të ngjashme me kohën e UNMIK-ut. A është një prapakthim politik?

Beqaj: Ne njërën anë, është shprehje e infantilietit politik po aq sa është edhe ambicie e paepur për vazhdimin e shtetit të kapur nga ana e LDK-së, në anën tjetër, moskuptim i duhur nga ana e Albin Kurtit për rëndësinë pushtetit dhe moskuptim real i pengesave të trashëguara nga pushtetet e trashëguara të shtetit të kapur. Zyrtarët më të lartë të LDK-së vazhdojnë të mbështetësin politikën e dështuar të komandantëve në politikë, Ndërsa Vjosa Osmanin, deri sot, po e përdorin si mbulesë për këtë!

Koha.net: Në relacion me dialogun, integrimin evropian dhe marrëveshjen përfundimtare me Serbinë, a kanë komoditet të sillen kësisoj këto dy subjekte që duan të bëjnë qeveri?

Beqaj: Para se gjithash po dështojnë me problemet jetike ekonomike sociale, të drejtësisë, shëndetësisë dhe arsimit. Ndërsa procesi i integrimit evropian, edhe ashtu, pas deklarimeve të fundit të Macronit se Evropa duhet ta reformoj veten dhe t`i zgjidh problemet e veta , na ka bërë me dije, se mbetemi jashtë fokusit evropian. Sa i përket dialogut, mendoj se ata që e bëjnë këtë temë urgjente, në fakt dëshirojnë përfundimin urgjent të Qeverisë eventuale!

Koha.net: Më e mundshme është marrëveshja apo dështimi, sipas zhvillimeve aktuale?

Beqaj: Marrëveshja do të jetë e mundshme nëse palët e kuptojnë se pasojat nga dështimi i marrëveshjes do të jenë shumëfishë më të mëdha se sa përfitimet nga marrëveshja!