Bahtiri i kërkon Qeverisë të dërgojë në Kuvend propozimin për bashkimin e Mitrovicës

Kryetari i Komunës së Mitrovicës, Agim Bahtiri, ka kërkuar nga Qeveria e Kosovës që të ndërmarrë hapat e nevojshëm për ta dërguar në Kuvend propozimin për ndryshimin e Ligjit që do ta bashkonte Mitrovicën në një komunë të vetme.

Përmes një postimi në Facebook, Bahtiri ka thënë se kërkesa e tij për bashkimin e qytetit është mbështetur edhe nga të gjitha partitë politike në Kuvendin e Komunës së Mitrovicës.

“Unë kam kërkuar bashkimin e qytetit të Mitrovicës në një komunë të vetme, ashtu siç ka qenë gjithmonë, kërkesë e cila është mbështetur edhe nga të gjitha partitë politike në Kuvendin e Komunës së Mitrovicës. Ndërsa, tash Qeveria duhet të bëjë veprime konkrete për ndryshimin e ligjit përkatës, që do ta bënte Mitrovicën me një komunë të vetme”, ka thënë Bahtiri, raporton Koha.net.

Ai thotë se qarqe të caktuara politike po e kundërshtojnë këtë nismë, por që nuk po i kundërshtojnë veprimet për ndarjen e Kosovës të kryetarëve të komunave me shumicë serbe në veri.

“Pra, si është e mundur që unë nuk kam të drejtë të punoj për bashkimin e qytetit, i cili gjithmonë ka qenë një dhe i vetëm, e dikush tjetër prej kolegëve të mi serb paska të drejtë të kërkojë ndarjen e Kosovës? Unë e di saktë çka dua dhe jam thellësisht i bindur se bashkimi do të ndodhë, gjë që do ta dëshmojë e ardhmja e afërt. Mirëpo, me vjen keq që institucionet qendrore nuk e kanë këtë informacion, e që do të duhej ta kishin”, ka thënë më tej kreu i Komunës së Mitrovicës.

Ai i ka bërë thirrje Qeverisë së Kosovës që të veprojë sa më shpejt dhe ta dërgojë në Kuvend propozimin për ndryshimin e ligjit që do të bashkonte Mitrovicën në një komunë, “sepse nuk ka rrugë tjetër përveç bashkimit të qytetit”.

Edhe Arbëri 17 dhj 2018 Bahtiri thotë se nëse pengohet kërkesa drejtuar Qeverisë për bashkim të Mitrovicës, do të marrë masa

“Ata që thirren në Planin e Ahtisaarit duhet ta dinë se ai është projekt i implementuar dhe i tejkaluar, që e ka sjellë pavarësinë e Kosovës. Mirëpo, Kosova nuk mund të mbetet peng i asnjë plani dhe asnjë njeriu, por duhet të zhvillohet konform asaj që e bën funksional shtetin e pavarur dhe sovran të Kosovës”, ka përfunduar Bahtiri.

Më 30 nëntor, Asambleja e Komunës së Mitrovicës i dha mbështetjen e plotë iniciativës e cila i kërkon Qeverisë ta procedojë në Kuvend ndryshimin e disa neve të Ligjit për kufijtë administrativë të të dy komunave të Mitrovicës.

Me vota unanime, Kuvendi Komunal i Mitrovicës miratoi këtë iniciativë.