“Aventura” e ministrit të Drejtësisë për shuarjen e Gjykatës së Tenderëve

Saktësisht 10 vjet pas themelimit të Organit Shqyrtues të Prokurimit, i cili njihet si “gjykatë e tenderëve”, ka lindur ideja që ky institucion të shuhet.

Autoriteti i cili mbikëqyr shpenzimin e rreth 400 milionë eurove të buxhetit publik çdo vit nuk do të funksionojë shumë shpejt si autoritet i pavarur, por do të bëhet departament i gjykatës, shkruan sot Koha Ditore.

Ministri i Drejtësisë, Abelard Tahiri, të hënë ka deklaruar se është e domosdoshme që OShP-ja të shuhet në mënyrë që të mundë të jetë më efikase në trajtimin e çështjeve që kanë të bëjnë me shpenzimin e parasë publike.

Ai ka theksuar se gjithë ky ndryshim pritet të bëhet në kuadër të rishikimit funksional të sektorit të sundimit të ligjit, ndërkaq lëndët e kësaj natyre mund t’i kalojnë Gjykatës Themelore në Prishtinë.

Por monitorues nga Shoqëria Civile që fokus e kanë sistemin e drejtësisë, e edhe prokurimin publik e kanë kritikuar ashpër nismën e ministrit Tahiri. Sipas tyre, kjo është një “lojë” tjetër e kësaj ministrie si formë për të ikur nga problemet reale që ka sistemi. (Detajet mund t’i gjeni në numrin e sotëm të Kohës Ditore)