ATK-ja njofton se ka zhvilluar aplikacioni për të aplikuar për masat e Pakos Ekonomike

Agjencia Tatimore e Kosovës ka njoftuar se ka zhvilluar aplikacionin dhe të punësuarit mund të parashtrojnë kërkesa për të përfituar nga tri masat e Pakos së Ringjalljes Ekonomike.

Sipas ATK-së qytetarët mund të aplikojnë tash në faqen e saj për masën: 1.1 – Rikthimi në punë i atyre që kanë humbur vendin e punës gjatë pandemisë; 1.2 – Mbështetja për të punësuarit e formalizuar dhe 1.3 Mbështetja e punësimit të grave.

Të drejtë aplikimi kanë të gjithë të punësuarit e rinj, të cilët janë të deklaruar në ATK për periudhat nga korrik 2021 e tutje.

“Pra, përmes ueb-faqes së ATK-së, të punësuarit kanë mundësi të aplikojnë për të përfituar nga masat e Pakos së e Ringjalljes Ekonomike, si:

Masa 1.1 – Rikthimi në punë i atyre që kanë humbur vendin e punës gjatë pandemisë - Mbështetje për tre (3) muaj nga njëqind euro (100€); Masa 1.2 – Mbështetja për të punësuarit e formalizuar - Mbështetje për tre (3) muaj nga pesëdhjetë euro (50€); Masa 1.3 – Mbështetja e punësimit të grave - Mbështetje për tre (3) muaj nga pesëdhjetë euro (50€);

Aplikimi është i hapur nga sot dhe deri më 15 tetor 2021 në ora 24:00. Aplikacioni “Pako e Ringjalljes Ekonomike – Kërkesë për subvencionim të pagës” është në dispozicion të tatimpaguesve, gjegjësisht të punësuarve në ueb-faqen e ATK-së ëëë.atk-ks.org - tek linku Shërbimet elektronike”, thuhet nga ATK.