Komuna e Malishevës, përmes një komunikate njofton se sot ka filluar asfaltimi i rrugës që lidhë dy lagje në fshatin Vërmicë dhe në të njëjtën kohë, për njërën lagje, shkurtohet rruga për nxënësit të cilët shkojnë në shkollën e fshatit duke mundësuar kështu edhe siguri më të madhe për nxënësit dhe banorët, transmeton Koha.net.
“Gjatë punimeve në asfaltimin e rrugës në fshatin Vërmicë, ishin të pranishëm edhe Kryetari i Komunës së Malishevës, Ragip Begaj dhe drejtori i Drejtorisë së Urbanizmit, Islam Vrenezi, të cilët e kanë parë nga afër realizimin e këtij projekti me rëndësi të madhe për banorët e të dy lagjeve”, thuhet në komunikatë.
“Kjo ka qenë një kërkesë e hershme e banorëve të lagjeve Ukaj dhe Kastrati, dhe ne falë angazhimeve tona për rregullimin e infrastrukturës së përgjithshme, kemi arritur që të realizojmë edhe këtë projekt dhe besoj që banorët tani janë të kënaqur, pasi kjo rrugë jo vetëm që i lidhë dy lagjet, por edhe e shkurton rrugën për nxënësit”, tha kryetari Begaj. Me këtë rast Begaj i ka uruar edhe banorët për rrugën e re dhe këtë investim të radhës në fshatin Vërmicë.
Gjithashtu, edhe Drejtori i urbanizmit, Islam Vrenezi, tha se kjo rrugë është e gjatë 460 metra dhe me gjerësi prej pesë metra.
