Abdixhiku: Trishtim, djemtë më të zotë të poshtëruar nga një qeveri që nuk dëgjon për ta

Kryetari i Lidhjes Demokratike të Kosovës, Lumir Abdixhiku, e ka quajtur trishtim e dëshprim protestën e Njësitit Special Intervenues para Qeverisë së Kosovës.

Ai ka thënë se policët elitarë janë poshtuar nga Qeveria, e cila sipas tij, nuk po dëgjon për ta kur kanë nevojë.

“Trishtim. Dëshpërim. Njësia më elitare e shtetit detyrohen në protestë. Heronjtë e veriut, djemtë më të zotë, të poshtëruar nga një Qeveri që nuk dëgjon për ta kur ata kanë nevojë. Kosova meriton më mirë. Kosova mundet më shumë”, ka shkruar Abdixhiku në Facebook, ku ka bashkangjitur edhe disa fotografi të protestës.

Policët elitar kanë kërkuar shtesa më të lartat sesa ato që i ka propozuar Qeveria si dhe kategorizim të vendeve të punës.

Sipas propozimit të Qeverisë, shtesat për NJSI-në janë rreth 150 euro, ndërsa në kërkesë policët kanë thënë se ajo duhet të caktohet në vlerë prej 50 për qind të pagës bazë.