Kryetari i Lidhjes Demokratike të Kosovës, Lumir Abdixhiku, të mërkurën ka paralajmëruar një takim me presidenten Vjosa Osmani, pas takimit që pati me gazetarë e analistë në “rrugën e re, pa Kurtin”.
Duke folur për mediat, Abdixhiku ka pohuar se do të takohet me Osmanin për të diskutuar gjendjen e tensionuar në veri, si pjesë e "planit të LDK-së për dalje nga kriza".
Pas takimit me gazetarët dhe analistët, Abdixhiku ka vlerësuar kontributin e tyre për idetë për daljen nga kriza, ndërsa ka thënë se do t'i bëjnë publike disa pika që i kanë prezantuar aty.
Sipas kryetarit të LDK-së, vendi nuk mund të jetë peng i një ideologjie, duke iu referuar kryeministrit Kurti.
“Gjendja është e rëndë, e zymtë. LDK-ja nuk mund të qëndrojë duar kryq. Kosova nuk mund të jetë peng e një ideologjie, por ka njerëz që i dalin zot. Kemi prezantuar disa pika, në fund do ta bëjmë publike. Do të vazhdojmë edhe me të tjerët përfshirë edhe me presidenten”, ka thënë Abdixhiku.
Ditë më parë, Abdixhiku e kishte refuzuar ftesën e Osmanit për një takim të propozuar nga kryetari i AAK-së, Ramush Haradinaj. Përgjigje refuzuese kishte dhënë edhe PDK-ja.
LDK-ja ka nisur mobilizimin për takimet, që siç i ka konsideruar ajo, “për kapërcimin e izolimit dhe krizës”, për të cilin e fajësojnë kryeministrin Albin Kurti. Sot patën takim me gazetarë e analistë. Në ditët në vijim, takimi i dytë pritet të mbahet me organizata të shoqërisë civile, i treti me profesorë universitarë e ish-diplomatë dhe i katërti me biznese nga sektori privat në vend.
Ai komentoi edhe deklaratën e kryeministrit Albin Kurti, i cili gjatë ditës tha se nuk do takojë të enjten kryeministrin e Shqipërisë, Edi Rama. Abdixhiku tha se kjo tregon shumë për gjendjen në të cilën ka ardhur Kosova.
“Natyrisht se kryeministri i Shqipërisë është i mirëseardhur në Kosovë. Çdo kryeministër i Shqipërisë duhet të jetë gjithmonë i mirëseardhur në Kosovë. Fakti që ne e diskutojmë një çështje të tillë, nëse duhet të mirëpritet një kryeministër i Shqipërisë tregon shumë për gjendjen në të cilën ka ardhur Kosova dhe nuk mund ta normalizojmë këtë gjendje sinqerisht. Kryeministri i Shqipërisë, pozicioni i tij, atë që përfaqëson ai dhe populli shqiptar janë të mirëseardhur në shtëpinë e tyre në Kosovë, gjithmonë”, shtoi Abdixhiku.
Abdixhiku për takimin me opinionistë e gazetarë: Debat nacional mbi gjendjen dramatike në vend
Kryetari i Lidhjes Demokratike të Kosovës, Lumir Abdixhiku, është deklaruar rreth takimit të së mërkurës me opinionistë e gazetarë, për çka ka thënë se është zhvilluar debat nacional “mbi gjendjen dramatike në vend”.
Nëpërmjet një postimi në Facebook, Abdixhiku ka thënë se po përpiqen në ndërtimin e një mendimi veprues që ballafaqon “theqafjen nacionale tek e cila vendi është futur tash e një kohë”.
“Sot, në Prishtinë, mbajtëm takimin e parë konsultues me opinionistë e gazetarë, si pjesë e iniciativës sonë për debat të gjerë nacional mbi gjendjen dramatike në vend. Mes një diskutimi të hapur e shumë përmbajtësor, dëgjuam të gjitha pikëpamjet e pjesëmarrësve mbi gjendjen aktuale politike në vend. Diskutuam, trajtuam, morëm sugjerime, ide e komente dhe mbi propozimin tonë e mbi rrugën politike që të gjithë duhet ta ndërtojmë. Do të vazhdojmë të takojmë e të flasim me secilin akter të Kosovës. Jemi në përpjekje të vazhdueshme për ndërtimin e një mendimi veprues, që ballafaqon theqafjen nacionale tek e cila jemi futur tash e një kohë të gjatë”, ka thënë ai.
