Për votuan 131 deputetë, kundër ishin 29, kurse 11 abstenuan. Asnjë nga amendamentet e propozuara nga Serbia nuk u miratua. Çështja tashmë kalon në duart e ministrave të Jashtëm të Këshillit të Evropës, të cilët duhet të vendosin përfundimisht nëse Kosova do të bëhet anëtarja më e re e organizatës. Kjo mbledhje pritet të mbahet në muajin maj. Udhëheqësit shtetërorë të Kosovës mirëpritën vendimin e Asamblesë Parlamentare, duke e cilësuar si dëshmi të përkushtimit të shtetit për demokraci
Shumica e deputetëve të Asamblesë Parlamentare të Këshillit të Evropës mbështeti të martën anëtarësimin e Kosovës në këtë organizatë me seli në Strasbourg.
Për votuan 131 deputetë, kundër ishin 29, kurse 11 abstenuan.
Asnjë nga amendamentet e propozuara nga Serbia nuk u miratua.
Çështja tashmë kalon në duart e ministrave të Jashtëm të Këshillit të Evropës, të cilët duhet të vendosin përfundimisht nëse Kosova do të bëhet anëtarja më e re e organizatës. Kjo mbledhje pritet të mbahet në muajin maj.
Udhëheqësit shtetërorë të Kosovës mirëpritën vendimin e Asamblesë Parlamentare, duke e cilësuar si dëshmi të përkushtimit të shtetit për demokraci.
“Sot Kosova shënoi një moment historik në rrugëtimin e saj evropian”, shkroi presidentja Osmani në Facebook.
Ajo theksoi se votimi në Asamblenë Parlamentare “është një dëshmi e përkushtimit tonë për drejtësi, barazi dhe për parimet themelore të demokracisë”.
“Falënderim nga zemra të gjithë atyre që nëpërmjet votës për mbështetën të gjithë qytetarët e Kosovës dhe kauzën tonë për të drejta të njeriut. Urime Kosovës dhe të gjithëve që kanë kontribuar në këtë arritje historik”, ka shtuar ajo.
Kryeministri Kurti, ndërkohë, shprehu optimizëm se ministrat e Jashtëm të Këshillit të Evropës do ta pranojnë Kosovën në folenë e tij gjatë një takimi që do ta mbajnë në maj.
“Meqenëse që nga viti 1951, Komiteti i Ministrave nuk ka marrë vendim ndryshe nga Opinioni i Asamblesë Parlamentare të Këshillit të Evropës, besojmë që edhe faza e ardhshme do të përmbyllet me sukses. Megjithatë, puna jonë do të vazhdojë”, ka shkruar Kurti në Facebook.
Këshilli i Evropës është një organizatë ndërkombëtare për të drejtat e njeriut, demokracinë dhe sundimin e ligjit në Evropë, me seli në Strasburg të Francës.
Është themeluar më 1949.
Këshilli mbron lirinë e shprehjes dhe të mediave, barazinë dhe minoritetet në vendet anëtare.
Një prej përfitimeve direkte të qytetarëve të Kosovës nga anëtarësimi eventual në Këshillin e Evropës do të jetë qasja në Gjykatën Evropiane për të Drejtat e Njeriut [GJEDNJ].
Diskutimi i gjatë dhe refuzimi i amendamenteve të dëmshme për Kosovën
Votimit i parapriu një debat që zgjati më shumë se dy orë. Shumica e deputetëve që morën fjalën e mbështetën anëtarësimin e Kosovës. Megjithatë, deputetët nga Franca thanë se do të ishte mirë që Kosova të bënte hapat e parë drejt themelimit të Asociacionit të komunave me shumicë serbe para votimit final të ministrave në maj.
Serbia kundërshton anëtarësimin e Kosovës në këtë organizatë. Ky shtet kishte propozuar disa amendamente në tekstin për rekomandimin që Kosova të pranohet në këtë organizatë.
Përmes tyre kërkohej që Kosova të mos pranohej në Këshillin e Evropës derisa Këshilli i Sigurimit i Kombeve të Bashkuara të mos vendosë për statusin e Kosovës. Serbia, po ashtu, kërkoi që në vazhdim të procesit Kosovës t’i vihet si kusht themelimi i Asociacionit të komunave me shumicë serbe. Këto amendamente nuk kaluan.
Autorja e raportit, Dora Bakoyannis, që është ish-ministre e Jashtme e Greqisë dhe motra e kryeministrit aktual grek, Kyriakos Mitsotakis, në fillim të debatit tha se gjatë punës së saj, asnjë “gur nuk ka mbetur pa u lëkundur” në përgatitjen e Raportit dhe tha se është konfirmuar se, pavarësisht disa mangësive, Kosova është demokraci funksionale, duke i bërë thirrje Këshillit të Ministrave të ftojë Kosovën të bëhet anëtare e Këshillit të Evropës.
Bakoyannis shpjegoi se Raporti nuk prek çështjen e njohjes apo mosnjohjes së pavarësisë së Kosovës dhe se kjo çështje duhet të mbetet kompetencë e shteteve.
“Kam identifikuar tri çështje të mbetura, ku ka qenë i nevojshëm veprimi i menjëhershëm. Implementimi i aktgjykimit për Manastirin e Deçanit, shpronësimi i ligjshëm i pronave të pakicës serbe dhe themelimi i Asociacionit. Gjatë angazhimit tim në këtë dosje të gjitha palët shtetërore më kanë paralajmëruar se nuk mund të pritet ndonjë progres në asnjë prej këtyre çështjeve të përmendura. Por, progresi real është vërejtur. Asambleja Parlamentare ka arritur ta zgjidhë atë që është identifikuar një prej rasteve më të rëndësishme të shkeljeve të së drejtës, implementimi i vendimit të Kushtetueses që do t’ia kthente pronën Manastirit”, ka thënë ajo.
Bakoyannis është shprehur optimiste se Asambleja do ta rekomandojë që Kosova të ftohet të bëhet anëtare.
“Në bazë të faktorëve të përmendur, mendim imi është që Asambleja Parlamentare do t’i rekomandojë Komitetit të Ministrave që ta ftojë Kosovën të bëhet anëtare e Këshillit të Evropës. Shpresoj që sot Asambleja do ta nënvizojë nevojën për të sjellë në ombrellën demokratike të Këshillit të Evropës dy milionë evropianë të tjerë për t’i mbrojtur ata nga shkeljet” ka thënë ajo para votimit.
Ajo ka ftuar shtetet që e kundërshtojnë anëtarësimin e Kosovës të qëndrojnë anash dhe të mos e shohin këtë çështje si çështje të shtetësisë.
“Që nga publikimi i Raportit, kam pranuar kritika të ashpra madje sulme personale në kuptimin e asaj si e kam trajtuar këtë. Këto kritika janë bërë nga përfaqësuesit e shteteve anëtare që nuk e njohin Kosovën, por do të dëshiroja kurajën që të jenë të sinqertë, sepse kjo çështje nuk ka qenë asnjëherë se çfarë kushtesh t’i vendosen Kosovës. Kundërshtimet e tyre nuk kanë të bëjnë me kriteret e anëtarësimit, ata kundërshtojnë vetë idenë e shtetësisë së Kosovës. Do të ishte më guximtare po të kishin vendosur të qëndronin anash. Raporti nuk paraqet raporte sa i përket shtetësisë”.
Nerea Ahedo, deputete nga Spanja, tha se i takon grupit që ka mbështetur pavarësinë e Kosovës, përkundër qëndrimit të shtetit të Spanjës, dhe e mbështeti anëtarësimin e Kosovës në Këshillin e Evropës.
“Ka pyetje që duhet të zgjidhen. Anëtarësimi do të forconte të drejtat e njeriut. Ne do të mbështesnim këtë rrugë [të anëtarësimit]. Mirëpresim integrimin dhe mendojmë që kjo do të jetë edhe një mënyrë për të promovuar stabilitetin në atë zonë”, ka thënë Ahedo.
Oleksii Goncharenko, deputet ukrainas, mbështeti po ashtu anëtarësimin e Kosovës.
"Dua të uroj Kosovën. Kosova e meriton. Bota e lirë duhet të bashkohet”, tha deputeti Goncharenko, vendi i të cilit nuk e njeh pavarësinë e Kosovës.
Deputeti gjerman Frank Schëabe përgëzoi Raportin për Kosovën dhe bëri thirrje për anëtarësim e saj.
“Këshilli i Evropës, me vlerat tona dhe rregulla, kemi dinjitetin tonë. Ky anëtarësim nuk është një mjet për negocim. Ju kërkoj të mbështesni raportin e balancuar dhe t'i refuzoni amendamentet që e rrezikojnë këtë baraspeshë”, tha ai.
Alain Milon nga Franca tha se do të votojë pozitivisht, por se “Raporti nënvizon madhësinë e punës që duhet të bëjë Kosova si themelimi i Asociacionit”… që sipas tij, hapa për këtë mund të bëhen para votimit në maj.
Ndërkohë, Iulian Bulai, anëtar nga Rumania, shtet i cili nuk e njeh pavarësinë e Kosovës, tha se e përkrah anëtarësimin e Kosovës dhe se pret që Kosova t’i përmbushë obligimet që vijnë me anëtarësim në Këshillin e Evropës.
“Lufta jonë nuk është për shtete, por për të drejtat e individëve. Kosova është gati dhe meriton të pranohet në Këshillin e Evropës, por duhet të sigurojë një mbrojtje të duhur për komunitetin serb", tha Bulai si përfaqësues i grupit, Aleanca e Liberalëve dhe Demokratëve të Evropës.
Piero Fassino nga Italia tha se të drejtat e pakicës serbe mund të mbrohen më mirë nëse Kosova është pjesë e Këshillit. Duke folur për Asociacionin, ai shprehu shqetësimin që ky trup të mos duket si Republika Sërpska në Bosnjë-Hercegovinë.
Disa delegatë nga Italia paraprakisht kishin propozuar që të shqyrtohej detyra e Kosovës për themelimin e Asociacionit para se Këshilli i Ministrave të vendosë për pranimin eventual të saj.
Edhe deputeti grek, Alexis Tsirpas, tha se e përkrah anëtarësimin e Kosovës në Këshillin e Evropës.
Lulzim Basha, nga Partia Demokratike në Shqipëri, tha se ata që ruajnë interesat e serbëve në Kosovë do të duhej të kërkonin anëtarësimin e Kosovës në Këshillin e Evropës, në mënyrë që ata t’i gëzojnë përfitimet nga të qenet pjesë e kësaj organizate.
Kundërshtimet e deputetëve nga Serbia, Mali Zi e vende të tjera
Ndërkohë, Zsolt Nemeth nga Hungaria si përfaqësues i Partisë Evropiane Konservatore tha se është kundër raportit që u prezantua më 16 prill.
Një ndër arsyet kryesore, siç tha ai, është çështja e mosthemelimit të Asociacionit të komunave me shumicë serbe.
Kundër Raportit të deputetes greke u shprehën edhe disa deputetë të Serbisë, Malit të Zi dhe Bosnjë-Hercegovinës.
Deputetja e Serbisë, Bilana Pantiq Pila, tha se çështja e themelimit të Asociacionit nuk mund të anashkalohet.
“Ju keni vendosur të shkelni ligjin ndërkombëtar. Nëse lejoni të ashtuquajturën Kosovë të anëtarësohet në Këshillin e Evropës, pa themelimin e Asociacionit, atëherë Asociacioni nuk do të themelohet asnjëherë”, u shpreh ajo.
Maja Vukiçeviq, deputete e Malit të Zi, po ashtu u deklarua kundër anëtarësimit të Kosovës në Këshillin e Evropës. Vukiçeviq është anëtare e Partisë Popullore Demokratike (DNP) proruse në Parlamentin malazez.
Branislav Borenoviq nga Bosnja-Hercegovina u shpreh kundër anëtarësimit dhe tha “duke vendosur në agjendë pranimin e të ashtuquajturës Kosovë po dëshmojmë kolapsimin e të drejtës ndërkombëtare, në zemër të Evropës”.
Kundër votuan edhe disa nga deputetë nga Franca, Spanja, Hungaria dhe Qiproja, kurse abstenuan disa deputetë të Italisë dhe Moldavisë.
Nga Kosova në selinë e Këshillit të Evropës ndodhej një delegacion i Kuvendit të Kosovës, ndërsa takime në nivele të ndryshme ka zhvilluar edhe ministrja e Jashtme e Kosovës, Donika Gërvalla.
Gjatë debatit, deputeti i Kuvendit të Kosovës, Enis Kervan nga Partia Demokratike Turke e Kosovës (KDPT), i bëri thirrje Asamblesë për votë pozitive për Kosovën.
“Ne promovojmë tolerancë, dialog… Kushtetuta jonë garanton mbrojtjen e të drejtave për të gjitha pakicat kombëtare. Pakicat kombëtare kanë përfaqësi në trupa të rëndësishme vendimmarrëse, duke përfshirë, Qeverinë, gjyqësorin dhe institucionet lokale”, tha Kervan.
Arben Gashi, deputet nga subjekti opozitar Lidhja Demokratike e Kosovës, kërkoi nga parlamentarët votë pozitive për Kosovën, “për të qenë në anën e duhur të historisë”.
“Për shumë gjatë, njerëzit tanë kanë vuajtur dhimbjen e padrejtësisë. Por sot qëndrojmë para jush si të barabartë, të gatshëm për të marrë vendin tonë në komunitetin e shteteve”, ka theksuar ai.
Votimi final
Kjo çështje tashmë kalon në duart e ministrave të Jashtëm të Këshillit të Evropës, të cilët duhet të vendosin përfundimisht nëse Kosova do të bëhet anëtarja më e re e organizatës.
Takimi i radhës i Këshillit të Ministrave do të zhvillohet në mesin e muajit maj.
Këshilli i Ministrave të Jashtëm në Këshillin e Evropës takohet një herë në vit, tradicionalisht në muajin maj.
Por ka zëra në qarqet diplomatike që thonë se anëtarësimi i Kosovës mund të mos vendoset fare në agjendën e takimit të ministrave në maj.
Kjo lidhet edhe me aktivitetin e vendeve të QUINT-it, Shtetet e Bashkuara, Gjermania, Britania e Madhe, Franca dhe Italia, të cilat zakonisht e mbështesin Kosovën, por tani duan të shohin nga Kosova lëvizje drejt themelimit të Asociacionit të komunave me shumicë serbe.
Asambleja Parlamentare e Këshillit të Evropës e ka mbështetur anëtarësimin e Kosovës në këtë organizatë.
Votuan gjithsej 171 deputetë. Pro ishin 131, kundër ishin 29 e 11 abstenuan.
Kosovës tani i ka mbetur vetëm një hap për anëtarësim në KiE, që është votimi i Këshillit të Ministrave të Jashtëm në muajin maj nëse hyn në rend dite.
Bakoyannis: Shtetet kundërshtare të anëtarësimit të Kosovës do të duhej të qëndronin anash
Raportuesja për Kosovën në Këshillin e Evropës, Dora Bakoyannis, ka thënë se Kosova është demokraci funksionale parlamentare me garanci të forta për pavarësinë e gjyqësorit dhe të drejta themelore të njeriut. Në seancën e Asamblesë Parlamentare të KiE-së ku po diskutohet lidhur me raportin për anëtarësimin ose jo të Kosovës në këtë organizatë, Bakoyannis ka theksuar se zgjerimi i juridiksionit të Gjykatës Evropiane do të kontribuonte në të drejtat e njeriut.
Ajo ka përmendur tri çështje që i ka konsideruar më problematike për t’u zgjidhur, atë për Manastirin e Deçanit, shpronësimin dhe Asociacionin e komunave me shumicë serbe.
“Kam identifikuar tri çështje të mbetura, ku ka qenë i nevojshëm veprimi i menjëhershëm. Implementimi i aktgjykimit për Manastirin e Deçanit, shpronësimi i ligjshëm i pronave të pakicës serbe dhe themelimi i Asociacionit. Gjatë angazhimit tim në këtë dosje të gjitha palët shtetërore më kanë paralajmëruar se nuk mund të pritet ndonjë progres në asnjë prej këtyre çështjeve të përmendura. Por, me një punë persistente progresi real është vërejtur. Asambleja Parlamentare kas arritur ta zgjidhë atë që është identifikuar një prej rasteve më të rëndësishme të shkeljeve të së drejtës, implementimi i vendimit të Kushtetueses që do t’i kthente pronën Manastirit”, ka thënë ajo.
Bakoyannis është shprehur optimiste se Asambleja do ta rekomandoj që Kosova të ftohet të bëhet anëtare.
“Në bazë të faktorëve të përmendur, mendim i imi është që Asambleja Parlamentare do të rekomandoj Komitetit të Ministrave që të ftoj Kosovën të bëhet anëtare e Këshillit të Evropës. Shpresoj që sot Asambleja do ta nënvizoj nevojën për ta sjellë në ombrellën demokratike të Këshillit të Evropës, dy milionë evropianë të tjerë për t’i mbrojtur ata nga shkeljet”.
Ajo ka ftuar shtetet që e kundërshtojnë anëtarësimin e Kosovës, të qëndrojnë anash dhe të mos e shohin këtë çështje si çështje të shtetësisë.
“Që nga publikimi i raportit, kam pranuar kritika të ashpra madje sulme personale në kuptimin e asaj sie kam trajtuar këtë. Këto kritika janë bërë nga përfaqësuesit e shteteve anëtare që nuk e njohin Kosovën, por do dëshiroja kurajon që të jenë të sinqertë sepse kjo çështje nuk ka qenë asnjëherë se çfarë kushte t’i vendosen Kosovës. Kundërshtimet e tyre nuk kanë të bëjnë me kriteret e anëtarësimit, ata kundërshtojnë vetë idenë e shtetësisë së Kosovës. Do ishte më guximtare po të kishin vendosur të qëndronin anash. Raporti nuk paraqet raporte sa i përket shtetësisë”.
Kervan: Kosova ka bërë progres të shquar për anëtarësim në KiE
Përfaqësuesi i Kosovës, Enis Kervan, i ka bërë thirrje Asamblesë që të votojë në mbështetje të Kosovës.
“Kosova ka bërë progres të shquar për anëtarësim në KiE. I kemi zbatuar parimet e sundimit të së drejtës, demokracisë dhe të drejtave të njeriut me zotimin për mbrojtjen e pakicave kombëtare. Korniza jonë ligjore vë standard të lartë në përputhje me standardet evropiane për mbrojtjen e të drejtave të pakicave”, ka thënë ai.
Iulian Bulai, anëtar nga Rumania, ka thënë se pret që Kosova të përmbushë obligimet që vijnë me anëtarësimin në KiE, ndërkohë që shprehu përkrahjen për anëtarësim.
“Ne po mbrojmë të drejtat e individëve, jo të shteteve dhe etnive. Vendimi i sotëm do të thotë më shumë të drejta për mbi 1.6 milionë njerëz”, ka thënë ai duke shtuar se Kosova meriton të pranohet në KiE.
E, deputeti grek, Alexis Tsipras, ka thënë se zbatimi i vendimit të Kushtetueses për pronën e Manastirit të Deçanit s’është e mjaftueshme, dhe se do të duhet të kishte progres edhe në çështjen e shpronësimit e Asociacionit.
“Kjo nuk mund të jetë e mjaftueshme për të mbështetur anëtarësimin. Që prej aplikimit të Kosovës kemi pasur eskalime shumë serioze, disa për shkak të Beogradit por edhe disa për shkak të vendimeve të Prishtinës. Na duhen vendime sa i përket ligjit për shpronësim dhe për Asociacionin”, ka thënë ai.
Mbështetje Kosovës i ka dhënë edhe Nerea Ahedo, deputete nga Spanja, e cila ka thënë se anëtarësimi “do të forconte të drejtat e njeriut”.
Po ashtu, Oleksii Goncharenko, nga Ukraina, duke shprehur mbështetje ka theksuar se Kosova e meriton anëtarësimin.
Deputeti gjerman, Frank Schwabe, ka bërë thirrje pro anëtarësimit. Alain Milon nga Franca tha se do të votojë pozitivisht.
Piero Fassino nga Italia ka theksuar se të drejtat e pakicës serbe mund të mbrohen më mirë nëse Kosova bëhet pjesë e Këshillit. Duke folur për Asociacionin, shprehu shqetësimin që ai të mos bëhet një “Republikë Serbe” si në Bosnjë.
Zsolt Nemeth nga Hungaria ka thënë se është kundër raportit që u prezantua sot dhe ka dhënë tri arsye për këtë. Ai ka theksuar se Kosova nuk i ka përmbushur zotimet, duke e renditur të parin mosthemelimin e Asociacionit.
“Janë tri arsye pse nuk e mbështesim raportin. E para, Kosova nuk ka përmbushur zotime, Asociacioni. E dyta është Serbia. Mohimi i interesave të Serbisë rrezikon stabilitetin”, ka thënë ai duke shtuar se arsyeja e tretë është se KiE shkon kundër qëllimeve të veta pro stabilitet nëse e pranon Kosovën.
Përfaqësuesja e Serbisë e quan Bakoyannisin hipokrite
Përfaqësuesja e Serbisë në Asamblenë Parlamentare të Këshillit të Evropës, Biljana Pantiq, e ka quajtur hipokrite raportuesen për Kosovën në Këshillin e Evropës, Dora Bakoyannis.
“Znj. Bakoyannis dua t’ju uroj për atë që po e bëni sot sepse do të shënoheni në histori si dikush që në mënyrën më brutale ka shkelur të gjitha normat e të drejtës ndërkombëtare. Keni thënë qartë që e ashtuquajtura Kosovë duhet të plotësojë tre kushte për të pasur opinion pozitiv. E para dhe kushti më fondamental ka qenë themelimi i Asociacionit të komunave me shumicë serbe. Tehemlimi i Asociacionit është parakusht themelor i dialogut mes Prishtinës dhe Beogradit. Nëse ftoni të ashtuquajturën Kosovë në Këshillin e Evropës pa themelimin e Asociacionit, ai nuk do të themelohet kurrë. Keni qenë ju që keni thënë: Themelimi i Asociacionit konsiderohet kusht i domosdoshëm për mbrojtjen efektive të pakicave kombëtare dhe të drejtave të tyre. Ju keni demonstruar se nuk keni integritet dhe jeni hipokrite", ka theksuar ajo.
Pasi përfaqësuesja serbe ka folur duke e kritikuar Bakoyannisin, presidenti i Asamblesë, Theodoros Rousopoulos, ka thënë se debatet duhet të bëhen në mënyrë të civilizuar dhe anëtarët të kenë kujdes në deklarata.
“Sipas rregullores dhe kodit të mirësjelljes, debatet duhet të bëhen në mënyrë të civilizuar dhe të rregullt. Anëtarët nuk mund të bëjnë asgjë që mund të shkaktojë çrregullim të procedurave”.
E përfaqësuesi i Bosnjë-Hercegovinës, Branislav Borenoviq, bëri thirrje të refuzohet raporti për anëtarësimin e Kosovës në Këshill të Evropës. Ai ka thënë se nuk mund të bëhet një propozim i tillë “pa pëlqimin e Serbisë”.
Ai ka thënë se mund t’i dërgojë mesazh “Katalonjës, Skocisë, Italisë Veriore, Tirolig Jugor, e shumë pjesëve të Ukrainës dhe Rerpublikës Serbe, që mund të shpallin njëanshëm pavarësinë e të pranohen në Këshill të Evropës”.
Në fund të diskutimit pritet edhe votimi i raportit.
Bilalli-Zendeli: Deklaratat kundër anëtarësimit të Kosovës kundërshtojnë qëllimin kryesor të KiE
Arta Bilalli-Zendeli, përfaqësuesja shqiptare e Maqedonisë së Veriut në Asamblenë e Përgjithshme të Këshillit të Evropës, ka thënë se deklaratat kundër anëtarësimit të Kosovës kundërshtojnë qëllimin kryesor të Këshillit të Evropës (KiE) që është parandalimi i luftërave.
Ajo i është përgjigjur disa anëtarëve të Asamblesë së Përgjithshme të KiE të cilët thanë se anëtarësimi i Kosovës do të krijonte konflikte të reja.
“Si shqiptare e Maqedonisë, e ndiej këtë temë si shumë të rëndësishme. Nuk pajtohem me opinionet e tipit që ky anëtarësim do të krijonte konflikte të reja në Evropës. A është krijuar ky Këshill për të parandaluar luftërat në Evropë? Prandaj këto komente nuk tingëllojnë aq mirë, kundërshtojnë qëllimin kryesor të Këshillit të Evropës. Ky anëtarësim do ta nxisë edhe dialogun sepse tani kemi dy palë të barabarta në dialog. Pra, barazia është vlerë themelore e KiE”, ka thënë Bilalli-Zendeli, e cila ka vlerësuar raportin pozitiv të raportueses për Kosovën në Këshillin e Evropës, Dora Bakoyannis.
“Ish-ministrja e Francës në vitin 1999 pati thënë se po të kishte çmim Nobel për liri do t’i jepej familjes Jashari nga Prekazi i Kosovës, 56 anëtarët e së cilës janë vrarë për një ditë të vetme. Çmimi nuk iu dha familjes Jashari, por duke përkrahur këtë raport, do t’i japim atdheut të tyre një vend në tryezën evropiane, në familjen e madhe evropiane aty ku e kanë vendin”, ka shtuar ajo.
Përfaqësuesja italiane: Anëtarësimi të ofrojë më shumë përbashkim, jo konflikt
Përfaqësuesja e Italisë në Asamblenë Parlamentare të Këshillit të Evropës, Elisabetta Gardini, derisa ka folur për anëtarësimin e Kosovës në këtë institucion, ka thënë se Italia dëshiron të sigurohet që ky anëtarësim të bëhet si pjesë e një procesi të bashkimit dhe jo të konfliktit.
Gardini ka theksuar se Italia e ka mbështetur Kosovën gjithmonë në aspiratat e saj euroatlantike.
“Italia gjithmonë i ka mbështetur aspiratat euroatlantike të Kosovës për këtë arsye gjithmonë kemi qenë në favor që Kosova të bëhet pjesë e familjes evropiane sepse në e mbështesim demokracinë, të drejtat e njeriut, si dhe identitetin tonë evropian. Duam të sigurohemi që ky anëtarësim të bëhet si pjesë e një procesi që na bashkon e nuk na përçan dhe që ofron më shumë përbashkim e jo më shumë konflikt. Globalisht po e jetojmë një moment tejet të vështirë në histori, ka shumë konflikte rajonale dhe e dimë që nuk duhet shumë që në situatë konfliktuoze të përhapet dhe e dimë që ka palë me ndikim nga jashtë në këto konflikte”, ka thënë ajo.
Gardini e ka përmendur edhe themelimin e Asociacionit të komunave me shumicë serbe, duke thënë se pret që Kosova ta përmbushë këtë zotim.
Basha: Ata që kanë në zemër interesat e serbëve të Kosovës, do të donin që anëtarësimi të bëhej sa më shpejt
Përfaqësuesi i Shqipërisë, Lulzim Basha, ka përmendur sulmin në Banjskë në shtator të vitit 2023, ndërsa ka theksuar se ata që kanë në parim interesat e serbëve të Kosovës, sot do të votonin të parët pro anëtarësimit të Kosovës në KiE.
“Ata që kanë në zemër interesat e serbëve të Kosovës do të ishin të parët që do kërkonin që ky akt të bëhej sa më shpejt. Në shtator të vitit të kaluar një skenar si Krimeja e Ukrainës ndodhi në Kosovë. Nuk ishte incident i izoluar, një sulm paramilitar i mirëpërgatitur për të krijuar ndarje të territorit të Kosovës, ngjashëm me atë që ka ndodhur në Krime. Kjo është pjesë e asaj ‘bote serbe’ që kërkon secesionin e Republika Srpskas dhe pastaj në Mal të Zi dhe shkon kundër çdo gjëje që besojmë. Votimi për Kosovën është akti më i madh i normalizimit për paqen dhe stabilitetin në Ballkan”, ka thënë Basha.
