Zëvendëskryeministri i Kosovës, Besnik Bislimi, ka bërë të ditur se nga Brukseli ka pasur kërkesë që për çështjen e dinarit të ketë takim mes Kosovës dhe Serbisë javën e ardhshme, por ai ka theksuar se nuk do të shkojë në këtë takim duke deklaruar se “çështja e dinarit s’është pjesë e dialogut”.
Ai ka thënë se i dërguari i Bashkimit Evropian për dialog, Miroslav Lajçak, i ka shkelur parimet “që i ka vendosur vetë”, duke thënë se është hera e parë që ka caktuar takim pa koordinim me palët.
“Zotëri Lajçak më ka dërguar shkresën mua sepse vazhdimisht komunikon me mua. Por kësaj radhe mendoj që ai i ka shkel parimet të cilat i ka vendosur vet për arsye që është hera e parë që ka caktuar një takim pa dakordim me palët dhe është munduar që të përcaktojë edhe agjendën përkundër parimit që ai ka vendosur në vitin 2021 që asnjë temë nuk vendoset në agjendë pa dakordim të palëve. Por, ftesa ka ardhur në adresën time”, është shprehur ai të mërkurën pas tryezës “Zhvillimi ekonomik për serbët në Kosovë”, të organizuar në Çagllavicë nga Qendra për Dialog Humanitar.
Sipas zv.kryeministrit, kur Lajçaku është pyetur se kush mund të jetë përfaqësuesi i Qeverisë për këtë çështje, ai ka thënë “kur të caktojmë ju informojmë”.
“S’ka kurrfarë zhvillimi. Ka kërkesë nga Brukseli që të mbahet një takim javën e ardhshme për çështjen e rregullimit të transferit të monedhave nga Serbia për Kosovë, por ky nuk është takim ku duhet të shkojë kryenegociatori, për arsye se çështja e dinarit nuk është pjesë e dialogut. Unë shkoj atëherë kur diskutohet për marrëveshjen bazike, kështu që do të shohim se kush mund të shkojë që të bisedojë për çështjen e dinarit, por që nuk është nga ekipi i kryenegociatorit”, ka thënë Bislimi.
Ai ka shtuar se Qeveria e Kosovës në ditët në vijim do të dalë me listë prej 10 masave, me të cilën do të tregojë se si do të kujdeset që qytetarët të mos dëmtohen në fazën kalimtare deri te zbatimi i plotë i Rregullores së re të BQK-së.
Vendet aleate i kanë kërkuar autoriteteve kosovare të shtyjnë zbatimin e vendimit të BQK-së që ndalon përdorimin e dinarit serb.
Ata kanë thënë duhet respektuar Kushtetuta e Kosovës, por serbëve lokalë duhet t’iu jepet kohë.
Bislimi sqaron deklaratën për eskalim: Ishte lutje për BE-në e jo kërcënim
Zëvendëskryeministri Besnik Bislimi është pyetur në lidhje me deklaratën që e pati dhënë në KTV ditë më parë. Ai ishte kritikuar se deklarata “mos na detyroni të eskalojmë situatën për t’iu treguar që e deeskalojmë prapë”, është e dëmshme dhe e rrezikshme për Kosovën.
Bislimi ka theksuar se kjo ka qenë lutje e jo kërcënim për Bashkimin Evropian – lutje për heqje të masave ndaj Kosovës.
“Ky është konotacion që mase dikush nga pjesa tjetër e spektrit politikë në Kosovë dëshiron me ja dhënë. Ne në vazhdimësi kemi dërguar shkresa që kemi thënë që ne i kemi përmbushur obligimet të cilat burojnë nga marrëveshja e Bratisllavës, e cila është për zbatimin e qëndrimeve të Bashkimit Evropian të datës 3 qershor, dhe ftesa e ime është lutje mos na detyroni që të merremi ende me eskalim sepse situata në teren është e mirë. Nuk është kërcenim është lutje mos na detyroni. Do të thotë hiqni masat se krijohet përshtypja sikur po detyrohemi që ende merremi me de-eskalim ku nuk ka. Nuk është kërcenim se Kosova nuk ka as kapacitet as interesim që të kërcënoj BE-në, ne po bëjmë maksimumin që të përshpejtojmë procesin e integrimit në BE”, ka thënë ai. /kp
