Tri partitë opozitare, PDK, LDK dhe AAK kanë konfirmuar se e kanë pranuar draftstatutin e Asociacionit të komunave me shumicë serbe.
Partia Demokratike e Kosovës ka thënë se dje e ka pranuar një kopje të draftit nga Zyra e të Dërguarit Special të BE-së për dialogun Kosovë-Serbi.
Edhe Lidhja Demokratike e Kosovës e ka pohuar të njëjtën gjë, ashtu si edhe AAK-ja.
Aleanca për Ardhmërinë e Kosovës ka thënë se drafti i është shpërndarë të gjithë anëtarëve të kryesisë se partisë dhe se ka kërkuar nga ta t’i bëjnë komentet e tyre lidhur me këtë draftstatut. Komentet do të diskutohen në mbledhjen e radhës që është thirrur më 7 dhjetor nga ora 17:00.
“Pas komenteve të anëtarëve të kryesisë, AAK do të dalë me qëndrim publik lidhur me draft-statutin e Asociacionit. Deri në atë kohë nuk do të ketë prononcime të tjera për këtë temë”, thuhet në kumtesën e AAK-së.
