PDK-ja e quan mashtrim publik dekretimin e Ligjit për Zyrtarët Publikë
Foto: PDK
Partia Demokratike e Kosovës (PDK), e ka quajtur të paprecedentë, mashtrim publik e shkelje të Kushtetutës dekretimin e Ligjit për Zyrtarët Publikë.
Koordinatori i Departamentit për Drejtësi në Kabinetin për Qeverisje të Mirë në PDK, Përparim Gruda, ka deklaruar para mediave të martën se me këtë veprim, Osmani iu është bashkuar shkeljeve të vazhdueshme të Qeverisë, duke theksuar se nëpërmjet këtij ligji po synohet administrata të vihet në shërbim të partisë.
“Gjykata ka gjetur një varg vërejtjesh, veçanërisht ka rrëzuar atë që ishte quajtur nga Qeveria si ‘Kriteri i Përshtatshmërisë për Punësim’, duke deklaruar se ky kriter, kështu siç është, është jokushtetues dhe nuk mund të përfshihet në ligj. Në aktgjykim u ngarkua Kuvendi i Kosovës dhe presidentja e Kosovës, që ligjin ta dekretonte ligjin dhe ta botonin në gazetën zyrtare pa këtë formulim. Pra, ligji të ishte i pastruar nga kriteri i përshtatshmërisë. Për habinë tonë, kur morëm ta lexojmë ligjin e publikuar në Gazetën Zyrtare, pamë se ka ndodhur diçka që nuk ka ndodhur asnjëherë në përvojën kushtetuese dhe parlamentare të Kosovës së pavarur. Ligji ishte dekretuar pa u adresuar kërkesa e Gjykatës Kushtetuese për heqjen e përshtatshmërisë. Pra, përshtatshmëria ekziston edhe sot në Ligjin e Dekretuar nga presidentja dhe është botuar në Gazetën Zyrtare, përkundër se Gjykata Kushtetuese e kishte rrëzuar atë”, ka thënë Gruda.
Sipas zyrtarit të PDK-së, Qeveria Kurti, do të mbahet mend më së shumti për shkelje sistematike “që ia ka bërë Kushtetutës”.
PDK-ja e kishte çuar në Gjykatë Kushtetuese për interpretim për këtë ligj, e ky institucion i kishte hapur rrugë dekretimit, por i kishte shpallur kundërkushtetutes disa nene të këtij ligji.
