Trysnia ndërkombëtare për të mos pasur tensione pak ditë para takimit të nivelit të lartë në Bruksel ka qenë arsyeja kryesore pse kryetari i Mitrovicës së Veriut, Erden Atiq, e ka shtyrë vendimin për lirimin e objektit komunal që shfrytëzohet nga struktura ilegale, ka thënë kryesuesi i Kuvendit Komunal të kësaj komune, Nexhat Ugljanin.
Komuna e Mitrovicës së Veriut të premten pasdite e ka shtyrë për herë të dytë ekzekutimin e vendimit për largimin e strukturave paralele të Serbisë nga hapësirat e objektit në “Lagjen e boshnjakëve”, i cili i takon Komunës. Në njoftimin e kryetarit Atiq, arsyetimi për shtyrjen e vendimit për herë të dytë ka qenë një raport që e ka kërkuar nga Inspektorati komunal në afat prej 15 ditësh.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoUgljanin ka thënë se ndërkombëtarët kanë bërë trysni të madhe që sot situata të mos eskalonte.
“Gjithë ditën kam qenë në vendin e punës. Dhe vendimi për lirimin e objektit ka qenë nën përcjellje të ndërkombëtarëve tërë ditën, ka pasur përfaqësues të KFOR-it, EULEX-it. Ka qenë edhe trysnia nga ndërkombëtarët që ka ndikuar në shtyrjen e vendimit, sidomos pasi bisedimet janë në Bruksel dhe për të mos eskaluar situata. Arsyeja kryesore pse u shty është trysnia nga ndërkombëtarët”, ka thënë ai në “Interaktiv” të KTV-së.
Ugljanin mendon se kjo situatë duhet të zgjidhet politikisht dhe që objekti të lirohet në mënyrë të rregullt, “që të mos tensionohet situata”.
Kryesuesi i Kuvendit Komunal ka thënë se janë edhe objekte të tjera që po shfrytëzohen nga strukturat paralele e për të cilat, sipas tij, po pritet vendimi i Komunës që të kërkohet edhe lirimi i tyre.
Ugljanin, megjithatë, ka shprehur çudi për “trysninë e ndërkombëtarëve për disa veprime për lëvizje të lirë” që Komuna e Mitrovicës së Veriut thotë se i ka marrë.
Por ai ka paralajmëruar se shumë shpejt do të vijnë me vendime të reja.
“Ne shumë shpejt do të vijmë me vendime të tjera, sidomos me rindërtimin e xhamisë si simbol i Mitrovicës. Në mbledhjen e ardhshme pritet ta miratojmë. Jemi në bisedime me BIK-un. Por edhe ndërtimin e shkollës dhe QMF-në”, ka thënë Ugljanin.
Ugljanin ka thënë se beson që zgjedhjet e hershme në veri do të mbahen në fundin e këtij viti.