Ish-komandanti i Llapit do të dëshmojë me zë në rastin e ish-krerëve të UÇK-së

Kërkesa e Zyrës së Prokurorit të Specializuar që dëshmia në formë të shkruar e ish-komandantit të Zonës Operative të Llapit, Rrustem Mustafa, dhënë në një proces të mëhershëm gjyqësor dhe gjatë intervistimit të tij nga Specialja të pranohet, është hedhur poshtë nga kryetari i Trupit Gjykues, Charles Smith. Kjo formë e të dëshmuarit u kundërshtua edhe nga mbrojtësit e të akuzuarve.

Kryetari i trupit gjykues, Charles Smith, ka refuzuar kërkesën e Zyrës së Prokurorit të Specializuar në rastin Thaçi dhe të tjerët për pranimin e deklaratave të mëhershme të dëshmitarit me numër 4647, të dhëna në një proces tjetër gjyqësor dhe gjatë intervistës së tij dhënë për Specialen vite më parë.

Kërkesa e prokurorit James Pace u bazua në nenin 154 të Rregullores së procedurës së provave, ku parashihet pranimi i deklaratave dhe i transkripteve në vend të pyetjeve të drejtpërdrejta.

Pace ka bërë të ditur se dëshmitari ishte komandant i Zonës Operative të Llapit në kohën e luftës. E komandant i kësaj zone ishte Rrustem Mustafa, i njohur si “Remi”.

“Shkurtimisht, ato trajtojnë strukturën e UÇK-së, rolin e dëshmitarit si komandant i Zonës Operative të Llapit, gjithashtu përfshijnë edhe udhëzimet dhe urdhrat që janë dhënë nga Shtabi i Përgjithshëm. Secila prej deklaratave që ne kërkojmë të pranohen sipas Rregullës 154 ose janë bërë përpara një gjykate në kontekstin e proceseve gjyqësore në një gjykatë në Kosovë, ose në mënyrë të drejtpërdrejtë ZPS-së. Dhe këto deklarata janë të regjistruara audio dhe video”, ka thekuar ai.

Kjo kërkesë u kundërshtua nga mbrojtësit e të akuzuarave Hashim Thaçi, Kadri Veseli, Jakup Krasniqi e Rexhep Selimi, meqë, sipas tyre, dëshmitari është intervistuar në cilësinë e të dyshuarit dhe se me anë të dëshmisë me shkrim pamundësohet që atij t’i shtrohen pyetje.

Edhe Arbëri 14 kor 2023 Remi në Speciale flet për takimet me Shtabin e Përgjithshëm dhe marrëveshjen e Rambujesë

“Ne kemi javë, për të mos thënë muaj që po përgatitemi që ky dëshmitar të vijë këtu dhe të japë dëshminë e vet me zë. Materialet me shkrim mund të përdoren në kundërpyetjet e këtij dëshmitari, ndërkohë që tani na thuhet që dokumenti me shkrim do të jetë prova ose dëshmia e këtij dëshmitari. Kështu që e gjithë puna që ne kemi bërë ka shkuar dëm”, ka theksuar avokati i Krasniqit, Aidan Ellis.

Ndërsa Lluka Mishetiq, avokat i Thaçit ka thënë se “të tillët janë dëshmitarë të cilët duhet të japin dëshminë e tyre me zë”.

Komandant Remi më herët pati konfirmuar se ka pranuar ftesën e ZPS-së që të dëshmojë në këtë proces.