Kryeministri i Shqipërisë, Edi Rama, u është kundërpërgjigjur kritikëve të tij për propozimin e një draftstatuti për Asociacionin e komunave me shumicë serbe në Kosovë.
“Ata që shajnë e akuzojnë pa e ditur fare çka përmban draft-Statuti i Asociacionit kanë frikë vetëm nga një gjë: Se mos humbasin armikun që u krijon kushtin ekzistencial që të flasin dhe të sillen si në llogore, ndërkohë që lufta ka mbaruar në 1999 dhe armiku është mundur!” ka shkruar ai në Twitter të premten në mbrëmje.
Një ditë më parë, Rama deklaroi se u ka dorëzuar presidentit francez Emmanuel Macron dhe kancelarit gjerman Olaf Scholz një draftstatut për Asociacionin.
I menjëhershëm ishte reagimi në Kosovë. Shefja e Grupit Parlamentar të Lëvizjes Vetëvendosje (LVV), Mimoza Kusari-Lila, ka thënë se ai dokument para se të shkojë në Francë e Gjermani, duhet të jetë i Kosovës. E Arben Gashi, shef i Grupit Parlamentar të Lidhjes Demokratike (LDK) ka thënë se për propozimin e draftstatutit të Asociacionit kompetent është vetëm Qeveria e Kosovës.
Kritika pati edhe në Shqipëri.
Bashkimi Evropian e ka kualifikuar të mirëseardhur çdo propozim konstruktiv për ta çuar përpara Asociacionin e komunave me shumicë serbe. I pyetur nga KOHA rreth draftit të dërguar nga kryeministri i Shqipërisë, Edi Rama, zëdhënësi i BE-së, Peter Stano, tha se për çdo draftpropozim, platformë diskutimi është dialogu midis Kosovës e Serbisë. Ai bëri të ditur gjithashtu se emisari i posaçëm për dialogun, Miroslav Lajçak, është i gatshëm të organizojë shumë shpejt një takim për draftim dhe se për këtë është në kontakt me palët.
Ndërsa në Serbi, presidenti i Serbisë, Aleksandar Vuçiq, ka thënë se drafti duhet të bëhet nga serbët.
© KOHA. Të gjitha të drejtat janë të rezervuara.
