IKD: Institucionet s’kanë nisur zbatimin e vendimit të Kushtetueses për Ligjin për Skemat Pensionale
Instituti i Kosovës për Drejtësisë (IKD) ka thënë se Kuvendi dhe Qeveria ende nuk kanë nisur së zbatuari vendimin e Gjykatës Kushtetuese për ndryshimin e Ligjit për Skemat Pensionale, edhe pse zbatimi i vendimeve të saj është i detyrueshëm.
Siç ka sqaruar IKD-ja për rastin, më 30 dhjetor 2022, Gjykata Kushtetuese kishte nxjerrë Aktgjykim, përmes së cilit ajo kishte deklaruar të pranueshme kërkesën e Gjykatës Supreme e cila kishte ngritur dyshime për kushtetuetshmërinë e paragrafit 2 të nenit 8 të Ligjit për Skemat Pensionale te Financuara nga Shteti në lidhje me nënparagrafin 2.3 të paragrafit 2 të nenit 6 të Udhëzimit Administrativ nr.09/2015.
Gjykata kishte vlerësuar se kjo dispozitë e Ligjit për Skemat Pensionale është në kundërshtim me Kushtetutën e Kosovës, (Barazia para Ligjit) dhe me Konventën Evropiane për të Drejtat e Njeriut (Ndalimi i Diskriminimit) dhe (Ndalimi i Përgjithshëm i Diskriminimit).
Sipas kësaj, gjykata kishte urdhëruar Kuvendin dhe Qeverinë, që brenda gjashtë muajve, jo më larg se me 15 korrik 2023, të ndërmarrin veprimet e nevojshme për plotësimin dhe ndryshimin e Ligjit.
IKD-ja ka thënë se Projektligji për Skemat Pensionale, ishte i përfshirë në Programin Legjislativ për vitin 2021 dhe 2022 për miratim në Qeveri, por i njëjti nuk ishte miratuar, ndërsa në programin legjislativ për vitin 2023 Qeveria në mbledhjen e saj të 121-të, nuk e përfshiu këtë projektligj në Programin Legjislativ.
IKD-ja nuk ka marrë përgjigje se kur do të fillojnë së zbatuari obligimet që dalin nga ky aktgjykim.
“Një reformë pensionale, ishte premtuar në fushatën elektorale të vitit 2021 nga partia që aktualisht udhëheq me Qeverinë dhe Kuvendin, por e njëjta nuk është inicuar përkundër faktit që kanë kaluar dy vite të Qeverisë Kurti 2 dhe përkundër faktit që bartësit e këtyre dy institucioneve, janë në dijeni për mohimin e të drejtës në pension kontributdhënës për mijëra qytetarë të Kosovës”, thuhet në komunikatën për media të institutit.
