Magbule Rashica prej 14 vjetësh punon në Aeroportin Ndërkombëtar të Prishtinës, por ankohet se “LIMAK Kosovo International” ia ka bërë një padrejtësi në punë. Ajo thotë se nga e hëna e 3 prillit është obliguar që të punojë në orarin e natës, ani se është nënë vetushqyese dhe ka dy fëmijë, njërin 10 dhe tjetrin 12 vjeç.
Me orarin e ri që ia kanë caktuar, Rashica thotë se e ka të pamundur të punojë.
“Nuk e di unë, ta bëjnë këtë ligj e ta sjellin një nënë në punë e t’ia mbyllin dy fëmijë fikall vetë në banesë. Çka nëse iu ndodh fëmijëve të mi diçka? Kush e merr atë përgjegjësi, kush?”, ankohet Rashica, e cila thotë se e ka të pamundur të gjejë zgjidhje për fëmijët.
Sipas nenit 27 të Ligjit të Punës, ndërrimi i natës për prindërit e vetëm mund të bëhet veç me pëlqimin e tyre.
“Ndërrimet e natës mund të kryhen nga prindërit e vetëm dhe gratë me fëmijë më të rinj se tre (3) vjeç, ose me fëmijë me aftësi të kufizuara të përhershme, vetëm me pëlqimin e tyre”, thuhet në Ligj.
Kësisoj, ky vendim i Aeroportit po vlerësohet i padrejtë nga avokati Anton Nrecaj, i cili thotë se nuk është në harmoni me Ligjin.
“Ligji lejon hapësirën dhe jep mundësinë që në këto raste t’u mundësohet nënave vetushqyese që të mos kenë orar të punës gjatë kohës ose ndërrimit të natës, për shkak se në atë periudhë ato duhet të jenë nën përkujdesje të fëmijëve”, thotë Nrecaj.
Lidhur më këtë, KOHA ka kontaktuar Remzije Selmanin, koordinatoren e njësisë së pastrimit, në të cilën punon Rashica, por ajo nuk ka qenë e gatshme të japë përgjigje në pyetjet që i janë shtruar për këtë rast.
Në komunikimin me të, ajo u shpreh se vetëm zbaton urdhra dhe se për më tepër, përgjigjet të kërkohen në Zyrën e Burimeve Njerëzore.
KOHA ka dërguar pyetje edhe në Zyrën për Media në Aeroport, e edhe në Zyrën për Burime Njerëzore, por asnjëra instancë nuk ka kthyer përgjigje, që nga e enjtja.
Avokati Nrecaj thotë se përveç Ligjit të Punës, prindërit janë të detyruar edhe me Ligjin për Mbrojtjen e Fëmijëve që të kujdesen vazhdimisht për ta. Ai thotë se ka pasur raste kur Policia ka arrestuar nëna të cilat kanë qenë duke punuar natën dhe i kanë lënë fëmijët nëpër banesa. Kësisoj, në rast se Rashica detyrohet të punojë natën, ai thotë se ekziston rreziku që organi i kujdestarisë të kërkojë përgjegjësi pse në atë periudhë të natës nëna nuk është me fëmijët dhe si rrjedhojë mund t’ia heqë edhe të drejtën prindërore.
Këtë veprim ndaj punëtores së ANP-së, Nrecaj më shumë e sheh si presion për ta vënë në situatë që ajo ta lërë punën.
“Ky është një lloj i presionit në mënyrë që gradualisht ajo të detyrohet të largohet nga puna, për shkak se më prioritet e ka përkujdesjen ndaj fëmijës, sesa punën”, ka thënë ai.
E Rashica është e gatshme ta lërë punën nëse nuk i ndryshon orari.
“Unë jam e obliguar ta lëshojë vendin e punës. Jam e obliguar ta lëshoj, se jo, fëmijët nuk i humbi, se për ta jam duke i ruajtur qe 6 vjet që jam pa burrë. Jam duke i ruajtur këta dy fëmijë dhe për ta jam duke punuar këtu”, ka thënë ajo.
Gjatë punës më shumë se njëdekadëshe në Aeroport, Rashica është marrë me pastrimin e aeroplanëve.
© KOHA. Të gjitha të drejtat janë të rezervuara.
