Bislimi priti në takim shefin e misionit të Luksemburgut e ambasadorin e Finlandës në Kosovë
Zëvendëskryeministri Besnik Bislimi, të martën ka pritur në takime të ndara shefin e misionit të Luksemburgut në Kosovë, Eric Dietz, dhe ambasadorin e Finlandës në Kosovë, Matti Nissinen.
Sipas njoftimeve për media, në këto takime është diskutuar për bashkëpunimin e këtyre vendeve me Kosovën.
Në këto takime thuhet se është diskutuar edhe për procesin e dialogut mes Kosovës dhe Serbisë si dhe propozimin evropian për normalizim të marrëdhënieve në mes të dy vendeve.
“Në takim u diskutua dhe mbi procesin e dialogut ku Qeveria e Republikës së Kosovës ka një qasje aktive dhe konstruktive, është e angazhuar për dialog parimor, nga i cili duhet të përfitojnë qytetarët e të dyja vendeve. Propozimi evropian për normalizim të marrëdhënieve ndërmjet Kosovës dhe Serbisë është i pranueshëm si bazë e mirë për diskutime të mëtejme dhe platformë solide për të ecur përpara”, thuhet në të dyja njoftimet e Zyrës për komunikim publik të Zyrës së Kryeministrit, për këto takime.
