Arbëri

Hovenier përsërit thirrjen për zbatim të të gjitha marrëveshjeve në dialog

Ambasadori amerikan në Kosovë, Jeffrey Hovenier, pas diskutimeve në Ambasadë për çështjen e Asociacionit, ka përsëritur thirrjen që të gjitha zbatohet të gjitha marrëveshjet në kuadër të dialogut me Serbinë.

“Sot mbajtëm një seancë dëgjimore për Asociacionin e komunave me shumicë serbe. Mirënjohës për akterët e ndryshëm të pranishëm, për ndarjen e pikëpamjeve dhe ekspertizave të tyre. Ne vazhdojmë të avokojmë për zbatimin e të gjitha zotimeve të dialogut”, ka shkruar Hovenier në Twitter.

Ambasada të martën mbajti një takim me përfaqësues qeveritarë, liderë politikë e shoqërinë civile për Asociacionin. Diskutimi ka qenë i mbyllur. Nën rregullin “Chatham House”, të pranishmit janë të lirë të përdorin informatat nga diskutimi, por nuk u lejohet të zbulojnë se kush çfarë komenti të caktuar ka bërë. Si rregull i diskutimeve ekziston që nga viti 1927. Është përdorur kryesisht për diskutime mbi çështjet kontroverse. Emrin e ka marrë nga Instituti Mbretëror për Marrëdhënie Ndërkombëtare i Mbretërisë së Bashkuar.

Një ditë para diskutimit, Derek Chollet, këshilltar i Departamentit amerikan të Shtetit, dhe Gabriel Escobar, i dërguari i posaçëm i SHBA-së për Ballkanin Perëndimor, në një kolumne ekskluzive për KOHËN kanë thënë se Asociacioni nuk nënkupton shtresë të re të pushtetit ekzekutiv dhe legjislativ.

Po ashtu, Fondacioni Friedrich Ebert në Prishtinë ka prezantuar një draft-statut për “Asociacionin e Komunave në të cilat komuniteti serb i Kosovës është shumicë”, i hartuar nga kjo organizatë në partneritet me Institutin Evropian për Paqe (EIP).

Ky draft-statut i propozuar nga FES-i thekson se Asociacioni do të jetë si person juridik i themeluar në përputhje me Kushtetutën dhe sistemin juridik të Kosovës. Theksohet se Asociacioni/Bashkësia do të ketë simbolet e veta zyrtare, duke përfshirë stemën dhe flamurin, të cilat do të dizajnohen nga Bordi i Asociacionit/Bashkësisë në përputhje me Kushtetutën e Republikës së Kosovës dhe Ligjin për Qeverisje Lokale.