Arbëri

Diskutimi në Ambasadën e SHBA-së mbyllet me thirrjen për zbatim të obligimeve nga dialogu

Përditësim - Përfundon takimi në Ambasadë

Ka përfunduar takimi në Ambasadën e Shteteve të Bashkuara të Amerikës në Prishtinë, në të cilin është diskutuar për çështjen e Asociacionit të komunave me shumicë serbe. Nga takimi janë parë të kenë dalë të gjithë përfaqësuesit e partive opozitare dhe shefi i stafit të kryeministrit, Luan Dalipi. Po ashtu janë parë teksa kanë dalë edhe disa ministra të Qeverisë Kurti dhe përfaqësues serbë.

 Pas takimit palët s’kanë dhënë deklaratë për mediat, ndërsa ambasadori amerikan, Jeffrey Hovenier, në Twitter ka përsëritur thirrjen që të gjitha zbatohet të gjitha marrëveshjet në kuadër të dialogut me Serbinë.

{gallery}


Përditësim - Pak minuta para nisjes së takimit në Ambasadën e SHBA-së, llogaria e kësaj ambasade në Twitter ka publikuar fotografi të ambientit ku do të mbahet takimi.

“Po presim të dëgjojmë perspektivat e menduara mirë nga një grup i ndryshëm liderësh të shoqërisë civile, zyrtarë qeveritarë e liderë politikë”, thuhet në publikim.

Siç ka raportuar “Ekonomia Online”, në takim po marrin pjesë zëvendëskryeministret Donika Gërvalla e Emilja Rexhepi, ministri i Shëndetësisë Arben Vitia, e Arsimit Arbërie Nagavci, ai për Kthim dhe Komunitete Nenad Rashiq dhe nënkryetari i Lidhjes Demokratike të Kosovës Lutfi Haziri.


Ambasada e Shteteve të Bashkuara të Amerikës në Kosovë sot, 31 janar, do të organizojë një diskutim me zyrtarë shtetërorë, liderë politikë, diplomatë e organizata të shoqërisë civile, lidhur me Asociacionin e komunave me shumicë serbe në Kosovë. Takimi pritet të nisë në orën 10 dhe të zgjasë rreth dy orë.

Të hënën në mbrëmje, Ambasada e SHBA-së ka bërë të ditur se pjesëmarrjen e kanë konfirmuar edhe Presidenca dhe Kryeministria.

Pjesëmarrjen në këtë takim e konfirmuar edhe nga Partia Demokratike e Kosovës (PDK) dhe Lidhja Demokratike e Kosovës (LDK). Shefi i Grupit Parlamentar të PDK-së, Abelard Tahiri ka thënë se do të dërgojnë përfaqësuesin e tyre në kuadër të këtij takimi.

Në ftesën që u pati dërguar partive, SHBA-ja pati thënë se e ka objektiv “të dëgjojë drejtpërdrejt nga aksionarë të ndryshëm për përkushtimin ndaj Asociacionit, në përkrahje të dialogut të ndihmuar nga BE-ja mes Kosovës dhe Serbisë”.

“Ne jemi duke organizuar këtë diskutim në përputhje me synimet tona afatgjate për të avancuar integrimin e Kosovës në strukturat evropiane dhe euro-atlantike dhe si reflektim për miqësinë tonë të kamotshme dhe përkrahjen për qytetarët e Kosovës. Ngjarja do të mbahet sipas rregullit ‘chatham house’”, thuhej në letër.

Nën rregullin “Chatham House”, të pranishmit janë të lirë të përdorin informatat nga diskutimi, por nuk u lejohet të zbulojnë se kush çfarë komenti të caktuar ka bërë. Si rregull i diskutimeve ekziston që nga viti 1927. Është përdorur kryesisht për diskutime mbi çështjet kontroverse. Emrin e ka marrë nga Instituti Mbretëror për Marrëdhënie Ndërkombëtare i Mbretërisë së Bashkuar.

Një ditë para diskutimit, Derek Chollet, këshilltar i Departamentit amerikan të Shtetit, dhe Gabriel Escobar, i dërguari i posaçëm i SHBA-së për Ballkanin Perëndimor, në një kolumne ekskluzive për KOHËN kanë thënë se Asociacioni nuk nënkupton shtresë të re të pushtetit ekzekutiv dhe legjislativ.

Vështrimi i plotë:

Po ashtu, Fondacioni Friedrich Ebert në Prishtinë ka prezantuar një draft-statut për “Asociacionin e Komunave në të cilat komuniteti serb i Kosovës është shumicë”, i hartuar nga kjo organizatë në partneritet me Institutin Evropian për Paqe (EIP).

Ky draft-statut i propozuar nga FES-i thekson se Asociacioni do të jetë si person juridik i themeluar në përputhje me Kushtetutën dhe sistemin juridik të Kosovës. Theksohet se Asociacioni/Bashkësia do të ketë simbolet e veta zyrtare, duke përfshirë stemën dhe flamurin, të cilat do të dizajnohen nga Bordi i Asociacionit/Bashkësisë në përputhje me Kushtetutën e Republikës së Kosovës dhe Ligjin për Qeverisje Lokale.

Draft-statuti i plotë: