Tejkalime të shumta ka bërë Ministria e Punëve të Jashtme dhe e Diasporës në pagesat mujore për qiratë e banesave të ambasadorëve. Ndryshe nga rregullorja që e përcakton shumën që mund të tejkalohet, MPJD-ja ka aprovuar qira mujore deri në 2 mijë e 600 euro përtej limitit, me arsyetimin e rritjes së çmimeve shkaku i inflacionit. Por diplomatë, të cilëve nuk u janë aprovuar kërkesat për shuma më të ulëta, e kanë kritikuar ministren për qasje selektive

Shuma të majme paguan Ministria e Punëve të Jashtme dhe Diasporës për qiratë e shefave të misioneve diplomatike. Tejkalime të shumave që janë përcaktuar me udhëzimet përkatëse ka në disa prej këtyre misioneve.

MPJD-ja e ka vënë në dispozicion listën me shumat e paguara për ambasadorët, pas kërkesës për qasje në dokumente zyrtare, për periudhën janar-shtator të vitit 2022. Këtë e bëri me vonesë dhe në shkelje të afateve ligjore. MPJD-ja ishte përgjigjur vetëm pas ankesës në Agjencinë për Informim dhe Privatësi.

Bazuar në udhëzimin përkatës administrativ, qiraja e lejuar për një ambasador, që bën pjesë në grupin e parë të diplomatëve, është 2 mijë e 400 euro. Kur shuma e qirasë e tejkalon limitin deri në 10 për qind, udhëzimi parasheh që të kërkohet aprovim nga sekretari i përgjithshëm.

Por dokumenti i konfirmon tejkalimet e shpenzimeve për qira në qendrat kryesore, ku Kosova ka ambasadorë. Qiraja mujore për shefin e Ambasadës në Francë, Mehdi Halimi, është 5 mijë e 12 euro e tejkalimi është mbi 2 mijë e 600 euro.

Shpenzime përtej kufizimit të lejuar me rregullore iu aprovuan edhe ambasadorit të Kosovës në Londër, Ilir Kapiti. Kostoja mujore për banesën e tij është 4 mijë e 175 euro e ajo vjetore që duhet mbuluar nga MPJD-ja është mbi 37 mijë euro.

Tejkalime të qirave ka edhe për shefin e Ambasadës në Berlin, Washington dhe New York. Por edhe për ambasadorë në vendet e grupit të tretë, për të cilat rregullorja e përcakton shumën mujore prej 1 mijë e 500 eurosh. Qiraja mujore e ambasadorit të Kosovës në Sofje, Delfin Pllana, është për mbi 600 euro më e lartë.

MPJD-ja nuk ofroi sqarime rreth tejkalimeve. Por për njërin nga vendimet e nxjerrë për ambasadorin Kapiti, për të cilin tejkalimi i aprovuar është 1 mijë e 800 euro, si arsyetim përmendet rritja e çmimeve të qirasë shkaku i inflacionit në Londër.

“Kjo ofertë ka një tejkalim prej 1,829 eurosh nga limiti i lejuar për qiranë e banesës së ambasadorit në Mbretërinë e Bashkuar në bazë të Udhëzimit Administrativ 01/2018 për plotësimin dhe ndryshimin e Udhëzimit Administrativ nr. 03/2012 për shpenzimet personale dhe operacionale në misionet diplomatike dhe konsullore të Republikës së Kosovës”, thuhet në dokument.

Kërkesa për tejkalime të qirave pati edhe nga diplomatët e rangut më të ulët. Ata që nuk morën aprovim, e denoncuar ministren e Jashtme, Donika Gërvalla, për qasje selektive, duke mos lejuar tejkalime të shumave më të vogla se ajo e ambasadorëve.

Mes tyre është ish-sekretari i parë në Londër, Viskont Jakupi, i cili në pamundësi për ta gjetur një banesë me çmimet që i përcakton rregullorja, është detyruar ta lëshojë misionin brenda 24 orësh.

“Sigurisht që secili diplomat apo zyrtar publik i përgjegjshëm do të dëshironte që gjërat të jenë konform ligjeve dhe rregulloreve. Por, po ashtu, një zyrtar publik i përgjegjshëm është i obliguar dhe ligjërisht që t'i denoncojë parregullsitë që ai i sheh në institucionin ku punon. Pa dashur t’i përsëris ato që i kam deklaruar e denoncuar në vazhdimësi, jemi dëshmitarë të shpenzimeve pa kontroll, kritereve të dyfishta, diskriminimit, diferencimit dhe përndjekjes politike”, ka thënë Jakupi.

Pas kthimit nga misioni, Jakupi e pati fituar dy herë rastin nëpërmjet Këshillit të Pavarur Mbikëqyrës për Shërbyesit Civilë, derisa edhe gjykata e obligoi MPJD-në që t’ia paguajë atij shumën e pagave prej rreth 20 mijë eurosh.

E, shkresat që kishte dërguar në adresë të Ministrisë, e ngarkuara me punë në Londër, Arrita Gjakova, konfirmojnë përplasjet dhe pakënaqësitë rreth pagesave për qiratë.

“Për të mos e tejkaluar kompetencën time lidhur me çështjen në fjalë, ju lusim që, në të ardhmen e afërt, të mos ketë zbatim të standardeve të dyfishta për lejimin e tejkalimeve të limiteve, andaj inkurajoj strukturat vendimmarrëse në MPJD që të ndryshojnë UA sa më shpejt që është e mundur sepse NE, diplomatët e karrierës, jemi të gjithë të informuar mirë dhe të sprovuar me këso lloj veprimesh, ndër vite dhe besa shumë të zhgënjyer”, ka shkruar Gjakova.

Nga 47 misione diplomatike, shteti nuk paguan qira vetëm për banesën e shefit të misionit në Ankara, Agon Vrenezi, shpenzimet e të cilit i mbulon Turqia.