Kryeministri, zëvendëskryeministrat dhe ministrat i kanë përmbledhur arritjet e tyre për vitin e shkuar në një raport 42-faqesh, në të cilin KOHA ka siguruar qasje tek pasi ka bërë ankesë në Agjencinë për Informim dhe Privatësi. Dokumenti përfshin një periudhë tjetër raportimi nga ajo që pati kërkuar kryeministri Kurti dhe përmban të listuara si arritje kryesore edhe vizitat dhe takimet jashtë vendit

Në mes të muajit shtator, kur Qeveria bëri një vit e gjysmë prejse e ka nisur mandatin, kryeministri Albin Kurti kërkoi raport të shkruar pune nga secili prej anëtarëve të kabinetit qeveritar.

“Patëm një diskutim me ministrat që për javën e ardhshme secili prej ministrave t’i sjellë katër apo pesë arritjet kryesore për një vit e gjysmë”, deklaroi Kurti më 14 shtator të vitit të kaluar.

Qeveria krijoi qasje në një draft-raport me të dhënat e mbledhura, tre muaj pasi KOHA kërkoi një kopje të tij dhe tek pas ankesës në Agjencinë për Informim dhe Privatësi. Dokumenti 42-faqesh përfshin një periudhë tjetër raportimi nga ajo që pati kërkuar kryeministri Kurti dhe përmban të listuara disa arritje për vitin e shkuar.

Në mesin e sukseseve Ministria e Mbrojtjes dhe ajo e Punëve të Brendshme renditën vizita e takime jashtë vendit.

E, prej arritjeve më të mëdha Ministria e Mbrojtjes e ka cilësuar bashkëzbarkimin e Forcës së Sigurisë përkrah Ushtrisë së Armatosur Britanike, në ishujt Falkland.

Në mes tjerash në këtë raport të Ministrisë së Mbrojtjes përmendet se buxheti për vitin 2022 është planifikuar të realizohet mbi 90 për qind. Po ashtu përmendet plotësim-ndryshimi i tri ligjeve të Ministrisë së Mbrojtjes dhe Forcës së Sigurisë së Kosovës, zhvillimi i operacioneve në mbështetje të autoriteteve civile për transportin, përcjellja e refugjatëve afganë e të tjera.

“Janë realizuar vizitat e ndërsjella dhe pjesëmarrja në iniciativat rajonale, ku gjatë këtij viti janë realizuar 11 vizita të ministrit të Mbrojtjes në vendet partnere dhe vende të tjera. Në të njëjtën kohë kemi pasur vizita të ministrave nga vendet partnere në Kosovë. Kemi marrë pjesë në iniciativat rajonale si në A5, në CEDC dhe në Konferencën e HALIFAX, në Kanada. Kemi realizuar edhe takime tjera të nivelit të drejtorëve për Politika të Mbrojtjes, komandantit të FSK-së dhe ministrit të Mbrojtjes. Pjesëmarrje në të gjitha takimet e ftuara nga sekretari i Mbrojtjes së SHBA-së lidhur me Grupin e Kontaktit për Mbrojte të Ukrainës”, thuhet mes tjerash në raportin e Ministrisë së Mbrojtjes.

Ministria e Punëve të Brendshme konsideron se gjatë vitit të shkuar e ka rritur integritetin e Policisë. Tregues i kësaj, sipas këtij institucioni, është numri i arrestimit dhe suspendimit të pjesëtarëve të policisë.

“Inspektorati Policor i Kosovës gjatë realizimit të planeve operative ka arrestuar 94 zyrtarë policorë, 2 doganierë dhe 6 qytetarë dhe ka suspenduar 142 zyrtarë policorë. Gjithashtu janë regjistruar 36 raste nën dyshimin për veprën penale ‘Keqpërdorim i pozitës apo autoritetit zyrtar’ dhe 4 raste nën dyshim për veprën penale ‘Marrje e ryshfetit’. Gjatë realizimit të planeve operative Pika 1 dhe Pika 2, Inspektorati Policor ka arrestuar dhe suspenduar 76 zyrtarë policorë”, thuhet në raport.

Kjo ministri përmend se ka bërë edhe luftimin e krimit dhe mbrojtjen e rendit dhe sigurisë publike. Ajo ka dhënë informacione mbi sasinë e substancave narkotike të konfiskuara e edhe për rezultate në luftën kundër korrupsionit.

“Janë zbuluar 5 laboratorë për kultivimin dhe prodhimin e drogave në të cilët janë gjetur: 67 kg e 159 g heroinë, 40 kg e 371 g marihuanë, 11828 bimë kanabisi dhe janë sekuestruar 250,000.00 euro. Totali i substancave narkotike të konfiskuara nga fillimi i mandatit të Qeverisë arriti në 1.8 tonë”, thuhet në raport. “Kundër detyrës zyrtare/korrupsion janë regjistruar 150 raste, janë arrestuar 36 persona dhe janë përcjellë 144 kallëzime penale ndaj 291 personave të dyshuar. Totali i shumës së sekuestruar nën dyshimin e keqpërdorimeve dhe shpëlarjes së parave nga fillimi i mandatit ka arritur në 14 milionë euro”.

Edhe dikastere të tjera qeveritare kanë listuar veprimet që i konsiderojnë si arritje më të mëdha të tyre.

Ministria e Drejtësisë ka renditur miratimin e koncept-dokumenteve, projektligjeve e strategjive. Krahas tyre ka përmendur edhe takimet në kuadër të fushatës globale “16 ditët e aktivizmit kundër dhunës me bazë gjinore”.

“Nga data 25 nëntor deri më datë 10 dhjetor, në tërë Kosovën, në kuadër të kësaj fushate janë organizuar dhe koordinuar mbi 200 aktivitete, ndër të cilat 39 janë organizuar vetëm nga Ministria e Drejtësisë. Qëllimi i kësaj fushate është parandalimi, luftimi dhe sensibilizimi i qytetarëve rreth dhunës në familje dhe asaj me bazë gjinore. Në këtë drejtim për 16 ditë Ministria e Drejtësisë ka takuar gra, vajza, burra e djem të fushave e profileve të ndryshme gjithandej Kosovës, në tryeza e konferenca, teatro e kinema, fshatra e qytete, klube sporti e biblioteka, vizita në shkolla e në komuna”, thuhet në raport.

Krahas kësaj, Ministria ka listuar si suksese hartimin e disa projektligjeve, përfshirë atë për Byronë për verifikimin dhe konfiskimin e pasurisë së pajustifikuar, për Gjykatën Komerciale e edhe Projektligjin për dokumentimin e krimeve të kryera gjatë luftës në Kosovë.

Në mars të këtij viti Qeveria Kurti i bën dy vjet prejse e ka nisur mandatin.