Arbëri

Bislimi: Së shpejti aplikojmë për statusin e vendit kandidat në BE

Zëvendëskryeministri i parë i Kosovës, Besnik Bislimi, deklaroi se ditëve në vijim Kosova do të aplikojë për statusin e vendit kandidat për anëtar të Bashkimit Evropian.

Ai në një intervistë për mediumin "Politico", tha të dielën se Kosova është e gatshme për trajektore të re, derisa shtoi se Bashkimi Evropian “kurrë nuk do të jetë i plotë pa Ballkanin Perëndimor”.

I pyetur për çështjen e vendeve anëtare të BE-së që ende s’e njohin pavarësinë e Kosovës, Bislimi u shpreh se beson që mosmarrëveshjet do të tejkalohen. Sipas tij, këto vende nuk do t’i shkaktojnë Kosovës probleme në rrugën përpara.

Duke qenë se anëtarësimi është një proces afatgjatë, ne besojmë se deri atëherë do të jemi të gatshëm t'i zgjidhim të gjitha mosmarrëveshjet që i kanë penguar këto vende ta njohin Kosovën dhe pastaj ta bëjnë këtë çështje të panevojshme, deklaroi Bislimi.

Sipas zëvendëskryeministrit, dialogu me Serbinë është proces i rëndësishëm, i mbikëqyrur nga Brukseli. Për normalizimin e marrëdhënieve mes dy vendeve, Bislimi tha se edhe një marrëveshje e pjesshme me Beogradin “do të ndihmonte në hapjen e rrugës për Kosovën për t’u afruar me BE-në”.

Por zëvendëskryeministri tha se ka një rrugë përpara pasi Brukseli së fundmi paraqiti një propozim të përditësuar.

Shpresojmë që shumë shpejt të fillojmë këtë proces të rëndësishëm dhe intensiv të normalizimit të ndërmjetëm. Do ta quajmë këtë një traktat bazë – një traktat që mund të sjellë zgjidhje për shumicën e mosmarrëveshjeve ndërmjet Kosovës dhe Serbisë, por jo domosdoshmërisht do të thotë normalizim i plotë...Vetë ideja për ta pasur këtë hap të ndërmjetëm mund të jetë e mjaftueshme, për të treguar përkushtimin e palëve ndaj atyre vendeve skeptike – dhe për t'i çuar ato në rrugën e njohjes”.