KEK-u dështoi të arrijë marrëveshje për remontin kapital të kaldasë
Njësia A5 e Termocentralit “Kosova A” nuk do të jetë në funksion gjatë dimrit. Korporata Energjetike e Kosovës e ka nënshkruar kontratën për remontin e turbinës dhe gjeneratorit, por ka dështuar të arrijë një marrëveshje për remontin kapital të kaldasë. Edhe nëse fillon tani puna në remont, ajo nuk pritet të përfundojë para 3 muajve. Në KEDS thonë se me uljen e temperaturave është rritur konsumi
Kosova këtë dimër nuk do të mund të llogaritë në rreth 150 megavate të energjisë së prodhuar nga njësia A5 e termocentralit “Kosova A”. Edhe pse katër ditë më parë, Korporata energjetike e Kosovës e ka nënshkruar një kontratë me negocim për remontin e turbinës dhe gjeneratorit, ajo ka dështuar që të arrijë marrëveshje për remont kapital të kaldasë.
Zëdhënësi i KEK-ut, Skënder Bucolli, ka thënë se KEK-u nuk ka mundur të arrijë marrëveshje për realizimin e remontit kapital të kaldasë bazuar në kushtet e paraqitura në dosjen e tenderit.
“Pas kësaj, KEK është në përfundim të ndryshimit të dosjes për Remont emergjent kapital të kaldasë me procedura të përshpejtuara dhe remonti emergjent kapital i kaldasë pritet të përfundojë brenda afatit të kryerjes së remontit kapital të turbinës dhe gjeneratorit”, ka thënë Bucolli.
Sipas praktikave të mëhershme, remonti kapital zgjat rreth 3 muaj. Kjo i bie që kjo njësi nuk do të hyjë në funksion para prillit të vitit të ardhshëm.
Sa i përket remontit kapital të turbinës dhe gjeneratorit, kontrata është nënshkruar me datën 5 dhjetor 2022 dhe pritet që operatori t’i fillojë punimet brenda afateve të parapara.
Aktualisht në KEK janë duke funksionuar dy njësi të “Kosovës A” dhe dy të “Kosovës B”. Por, kjo sasi nuk e plotëson konsumin gjatë dimrit dhe KEDS-i do të detyrohet që pjesën tjetër ta blejë.
E me ftohjen e temperaturave është rritur edhe konsumi i energjisë. Zyrtari për komunikim në KEDS, Lulzim Krasniqi, ka thënë se konsumi ditëve të fundit ka arritur në 1 mijë e 100 megavate për orë.
“Aktualisht furnizimi me energji elektrike është stabil. Prodhuesit vendorë po prodhojnë rreth 850 megavate në orë. Megjithatë, duke e pasur parasysh që jemi në gjendje emergjente të shpallur edhe nga institucionet relevante, kjo lë të kuptojmë se kemi të bëjmë me një situatë të paparashikueshme për ditët dhe javët në vijim”, ka thënë Krasniqi.
Një megavat energji në bursën hungareze gjatë të premtes është tregtuar nga 400 deri në 480 euro.
Por, nga KEDS-i kanë bërë të ditur se aktualisht nuk janë duke importuar dhe i gjithë konsumi po mbulohet nga prodhimi vendor. Një pjesë po mbulohet edhe nga depozitat e KEK-ut në KESH. Ndërsa 100 megavate në orë janë prodhuar nga burimet e ripërtëritshme, kryesisht nga era.
Zyrtarë të KEK-ut kanë bërë të ditur se janë duke prodhuar edhe 1500 megavate energji termike për Termokosin, e cila përdoret për ngrohjen e qytetarëve.
Qeveria e Kosovës dy ditë më parë ka miratuar nismën për lidhjen e Marrëveshjes Financiare ndërmjet Republikës së Kosovës dhe Bashkimit Evropian për programin IPA 2023. Në kuadër të kësaj marrëveshjeje, Kosova përfiton 75 milionë euro për tejkalim të krizës aktuale energjetike.
“Nismën për lidhjen e Marrëveshjes Financiare ndërmjet Republikës së Kosovës dhe Bashkimit Evropian për programin IPA 2023. Bashkimi Evropian është zotuar se do t’i ndihmojë vendet e rajonit me një pako për energjinë në funksion të tejkalimit të krizës aktuale energjetike. Në këtë kuadër për Kosovën janë zotuar 75 milionë euro për përkrahje të drejtpërdrejtë buxhetore në kuadër të programit vjetor IPA 2023”, thuhet në njoftimin e kryeministrisë.
Po ashtu një ditë më parë, Bordi Operacional i Kornizës Investuese të Ballkanit Perëndimor (WBIF) ka miratuar aplikimet e Kosovës për grante investive në vlerë prej mbi 55 milionë eurosh, për dy projekte energjetike - atë të ngrohjes qendrore solare dhe atë për parkun solar të KEK.
Marrëveshjet financiare do t’i nënshkruhen në ditët në vijim, duke i hapur rrugë zbatimit të këtyre projekteve.
