Anëtarë të Partisë Socialdemokrate kanë hedhur qershi në drejtim të kryeministrit të Kosovës, Albin Kurti.
Para pjesëmarrjes së tij në prezantimin e buxhetit në Prishtinë, kreu i Qeverisë është përballur me anëtarët e PSD-së, të cilët i kanë hedhur atij qershi të prishura për “t'i ngrënë”, duke aluduar se kreu qeveritar ka ndryshuar fjalët në arritjen e marrëveshjes për targa me Serbinë.
Kryetari i PSD-së, Dardan Molliqaj, para mediave ka thënë se aksionet e tyre nuk do të ndalen.
“Natën ka nënshkruar marrëveshje vartësi i tij i cili ka pranuar krejt marrëveshjet që i kemi kundërshtuar së bashku dhe të cilat janë të dëmshme për Kosovën. Fakt që kryeministri i Kosovës tenton të hyjë fshehtas në një takim publik me Polici të Kosovës, tregon çfarë marrëveshje ka bërë dhe sa të dëmshme ka qenë. Aksionet tona nuk do të ndalen, pasi këto marrëveshje janë të dëmshme”, ka thënë ai./KP
17:36
PSD-ja hedh qershi para Qeverisë: Kryeministri hëngri fjalët e tij
Partia Socialdemokrate ka hedhur qershi para objektit të Qeverisë së Kosovës të enjten, në shenjë proteste për arritjen e marrëveshjes me Serbinë për çështjen e targave. Kjo parti po e akuzon kryeministrin Albin Kurti se i ka “ngrënë fjalët e tij”.
Kosova dhe Serbia u pajtuan të mërkurën në mbrëmje në Bruksel që Serbia të mos lëshojë më targa me akronime të qyteteve të Kosovës e që Kosova të mos i gjobisë pronarët e veturave me targa ilegale. Në deklaratën e Bashkimit Evropian është përmendur që duhet të ketë fokus “urgjent” në çështjen e normalizimit të raporteve, por nuk është përmendur ndonjë datë, siç e përmendte Kurti muajin mars, të hënën kur dështoi arritja e marrëveshjes.
PSD-ja ka thënë se prapa marrëveshjes për targa fshihet “pranimi i Asociacionit të komunave me shumicë serbe”.
Në deklaratën e BE-së është thënë se palët po ashtu duhet t’i implementojnë marrëveshjet e mëhershme.
“Kryeministri po i përdorë diskutimet me qytetarë si platformë për t’i ikur temës kryesore, koncesionit. Ai është i interesuar që tema e mbrëmshme të harrohet sa më shpejt, sepse prapa pranimit të djeshëm për çështjen minore, si puna e targave, fshihej çështja madhore, pranimi i Asociacionit. Ato data e afate ishin për ta ushqyer imazhin prej rezistenti, i cili i dështoi. Kryeministri i hëngri fjalët e tij. Secilën. Bash sikur fabula me qershi. E dëmin po e hajnë qytetarët e vendit, pa dallim. z. Kryeministër, qershizat janë veç për juve”, thuhet në reagimin e PSD-së për protestën e së enjtes.
