Kanë nisur edhe dorëheqjet e pjesëtarëve serbë të veriut nga Forca e Sigurisë e Kosovës.

Burime të KOHËS në Ministrinë e Mbrojtjes thanë se kjo po bëhet nën presionin e grupeve të armatosura që kanë shtuar prezencën në këtë pjesë të Kosovës.

Sipas këtyre burimeve, të martën vetëm tre serbë nuk janë paraqitur në punë, pa dhënë shpjegime.

Ndërkaq, të mërkurën numri i tyre është shtuar dhe dorëheqjet e para veç janë deponuar.

Ngjashëm si me braktisjen e institucioneve të tjera, dorëheqje nga FSK-ja kanë paraqitur vetëm serbët e komunave të veriut, por jo edhe të komunave të tjera të banuara kryesisht me serbë.

Ndërkohë, ministri i Mbrojtjes, Armend Mehaj, ka thënë se janë tri kërkesa për demobilizim të cilat, siç ka theksuar, i ka pranuar prej kohësh dhe për të cilat janë duke u ndjekur të gjitha procedurat e rregullta.