Ministrja e Arsimit, Arbërie Nagavci, nuk ka hequr dorë nga kalendari i caktuar për zëvendësim të orëve të humbura mësimore në shtator si pasojë e grevës, pavarësisht kërkesës nga komunat për moszëvendësim gjatë të shtunave.

Në një letër të publikuar nga Asociacioni i Komunave, Nagavci ka thënë se është e pamundur që të zëvendësohen 22 ditët e humbura duke shtuar nga një orë mësimore në ditë.

“Sa i përket propozimit tuaj që kompensimi i 22 ditëve të humbura të bëhet duke shtuar nga 5 orë Brenda javës për çdo nxënës, ju njoftojmë se praktikisht dhe teknikisht është e pamundur të realizohet një gjë e tillë, si nga aspekti pedagogjik, ashtu edhe ai logjistik. Në këtë mënyrë, do të zgjatej dita e punës në shkolla, gjë që do të shkaktonte çrregullime në shkollat që punojnë në dy ndërrime, si dhe do të shkaktohej një barrë shtesë psikologjike e emocionale për fëmijët”, ka thënë Nagavci në përgjigje.

Më 7 tetor, kryetarët e komunave patën kërkuar që orët e mësimit të zëvendësohen çdo ditë duke shtuar orë në fund të ndërrimit. Arsye ishin përmendur se mësimi gjatë pushimeve ngarkon familjet, shton shpenzimet për ngrohje të shkollave e do të kishte telashe me transport publik.

Nga 25 gushti deri më 1 tetor, mësimdhënësit ishin në grevë duke kërkuar shtesa nga 100 euro në muaj deri në hyrjen në fuqi të Ligjit për Paga. Greva u pezullua pa marrëveshje me Qeverinë. Ministrja vendosi për zëvendësim të orëve duke ndryshuar kalendarin shkollor. Megjithatë, me të s’u pajtuan as nga Sindikata e Bashkuar e Arsimit, as prindërit e as komunat.