Pas përfundimit të procedurës disiplinore, Këshilli Gjyqësor i Kosovës (KGJK) ka vendosur që kryetares së Gjykatës Themelore në Mitrovicë, Ljiljana Stevanoviq, për katër muaj t’ia ulë pagën prej 30 për qind
Ajo më 22 mars në Beograd, kishte takuar presidentin e Serbisë, Aleksandër Vuçiq.
Ky vendim i KGJK-së ishte marrë në seancën e mbajtur më 28 prill 2022 dhe është publikuar të martën më 13 shtator 2022.
Nëpërmjet burimeve, “Betimi për Drejtësi” kishte mësuar se Stevanoviq ka arritur marrëveshje për pranimin e përgjegjësisë disiplinore në Panelin Hetimor, gjë e cila thuhet edhe në vendimin e publikuar tani nga KGJK-ja.
Kryetarja Stevanoviq ka pranuar se ka bërë shkelje disiplinore kur ishte takuar me kryeministrin e Serbisë, shkelje këto të përcaktuara në Ligjin për Përgjegjësinë Disiplinore të Gjyqtarëve dhe Prokurorëve si dhe në Kodin e Etikës për gjyqtarë, ndër to është edhe kur: “Kryen ndonjë funksion, detyrë ose shërbim, merr ndonjë përgjegjësi ose angazhohet në ndonjë aktivitet, kandidon ose zgjidhet në ndonjë funksion apo detyrë që është në kundërshtim me detyrat e gjyqtarit sipas Kushtetutës, ligjit për gjykatat dhe kodit të etikës profesionale për gjyqtarë” dhe “anëtarësohet në ndonjë subjekt politik, ose ndonjë organizatë tjetër politike, kërkon ose mban ndonjë post politik, kandidon ose zgjidhet në ndonjë post politik, apo angazhohet në ndonjë aktivitet politik”, sqarohet në vendim.
Tutje, thuhet se për panelin hetimor ka qenë jokontestuese që kryetarja Stevanoviq ka kryer shkelje, mirëpo si rrethanë lehtësuese është marrë pasi ajo më herët nuk ka pasur masë disiplinore dhe ka qenë e përkushtuar në funksionimin efektiv të gjykatës.
Stevanoviq është pajtuar me uljen e pagës prej 30 për qind si masë disiplinore.
Në vendimin e KGJK-së, pas aprovimit të marrëveshjes për pranimin e fajësisë, është vendosur që të revokohet edhe vendimi i 24 marsit 2022, ku Stevanoviq ishte suspenduar nga pozita e kryetares së Gjykatës Themelore në Mitrovicë.
Ajo ishte kthyer në këtë pozitë, dy muaj pas suspendimit dhe kishte raportuar për raportin e tremujorit të parë të vitit 2022, në mbledhjen e Këshillit Gjyqësor të Kosovës.
KGJK-ja, ulje të pagës prej 30 për qind për një periudhë prej 4 muajsh kishte bërë edhe për dy gjyqtare tjera të Gjykatës Themelore në Mitrovicë, Tatijana Virijeviq dhe Dragica Jakovljeviq, pasi po ashtu kishin marrë pjesë në takimin e ftuar nga presidenti i Serbisë, Aleksandar Vuçiq. /BetimipërDrejtësi
© KOHA. Të gjitha të drejtat janë të rezervuara.
