Jehona Lushaku nga Lidhja Demokratike e Kosovës e ka fajësuar Qeverinë për grevën në arsim që ka filluar nga sot, duke e akuzuar për papërgjegjësi dhe paaftësi në menaxhim të situatës.
Lushaku në një konferencë për media të enjten ka thënë se Qeveria e ka krijuar një situatë të paprecedentë duke mos dialoguar me sindikatat.
“Në vend se nxënësit të takonin për herë të parë mësuesit e tyre, të uleshin në bankat e tyre, sot kemi një situatë ku të gjitha shkollat janë të mbyllura. Të mbyllura për papërgjegjësinë e kësaj Qeverie për të dialoguar me kërkesat e mësimdhënësve për të gjetur zgjidhje. Mësimdhënësit kanë adresuar kërkesat e tyre, por nuk kanë gjetur mbështetje e as dialogim nga kjo Qeveri. Kur Kosova po ballafaqohet me një krizë të madhe në shumë fusha, mësimdhënësit duhet të dënohen qysh dje për të mos marrë paga për muajin gusht. LDK-ja me shumë shqetësim është duke e përcjell këtë situatë. Kjo situatë i dedikohet papërgjegjësisë dhe paaftësisë së Qeverisë”, ka thënë ajo. “Secila qeveri demokratike në secilin shtet demokratik e ka parimin e dialogimin me sindikatat, me grupe të interesit. Qeveria nuk i ka adresuar këto kërkesa. E ka krijuar një situatë të paprecedentë”.
Sipas saj, për herë të parë në arsimin e Kosovës, pagat e mësimdhënësve nuk janë ekzekutuar.
“Kjo e cenon dinjitetin e mësimdhënësve dhe tregon gatishmërinë e Qeverisë për t’i dënuar mësimdhënësit. Kjo tregon se sa jodemokratike është kjo Qeveri”, ka thënë ajo.
Lushaku në fund i bëri thirrje Qeverisë ta marrë më me seriozitet situatën dhe të gjejë një zgjidhje qysh sot dhe të bëhet ekzekutimi i pagave për mësimdhënësit.
Institucionet arsimore pothuajse në të gjithë vendin kanë filluar grevën në ditën e parë të fillimvitit të ri shkollor.
© KOHA. Të gjitha të drejtat janë të rezervuara.
