Vuçiq: Situata për njerëzit tanë në Kosovë është shumë e komplikuar
Presidenti i Serbisë, Aleksandër Vuçiq, ka thënë se populli serb në Kosovë, gjithnjë e më pak po i dëgjon lutjet e Beogradit që të ruajnë paqen me çdo kusht.
Vuçiq ka thënë se Serbia dëshiron paqe, por që, nëse serbët keqtrajtohen, atëherë shteti i tyre nuk do të dorëzohet por do të fitojë.
“Populli serb në Kosovë e M. gjithnjë e më pak po i dëgjon lutjet tona dhe lutjet tona që të përpiqemi ta ruajmë paqen me çdo kusht. Të kërkojmë nga shqiptarët të vijnë në vete, të kërkojmë nga serbët që të mos bien në provokim. dhe të mos bëni asgjë që mund të çojë në ndonjë konflikt. Kjo është kërkesa ime e madhe. Gjithçka që mund të them është se ne do të lutemi për paqe dhe do të kërkojmë paqe, dhe mund të them që nuk do të ketë dorëzim dhe Serbia do të fitojë. Nëse ata guxojnë të keqtrajtojnë serbët, vrasin serbët, Serbia do të fitojë”, ka thënë Vuçiq.
Vuçiq thotë se nuk mendon se është në interesin e Perëndimit që të ketë një konflikt në Ballkan.
Sipas tij, serbët e Kosovës janë shtyrë pas murit.
Ai ka theksuar edhe një herë se situata është shumë e vështirë dhe se ka frikë se do të jetë edhe më e vështirë.
“Unë kërkoj nga shqiptarët që të mos mendojnë se do të mund të bëjnë krime ndaj serbëve dhe se do të mund ta poshtërojnë Serbinë dhe popullin serb. Nëse mendojnë kështu, ju informoj se cili do të jetë rezultati. Serbia nuk provokon dhe nuk dëshiron konflikte, por nuk është një vend që do të mund ta fitoni lehtësisht si në kohën e Sllobodan Millosheviqit dhe Boris Tadiqit”, ka thënë Vuçiq.
