Arbëri

IKSHPK-ja i druhet përhapjes së mëtejme të COVID-19

Për të tretën ditë rresht, Kosova ka regjistruar numër katërshifror të të infektuarve me Sars-Cov-2, me 1 mijë e 390 raste të reja brenda 24-orësh. Është rritur edhe numri i të shtruarve në spitale, e më së shumti pacientë ka Klinika Infektive.

Një person e ka humbur betejën me COVID-19 në 24-orëshin e fundit, ka njoftuar Ministria e Shëndetësisë.

Në njoftimin e MSH-së bëhet, po ashtu, e ditur se janë regjistruar 1 mijë e 390 raste të reja të infektimit me Sars-Cov-2, virus ky që e shkakton pandeminë. Është kjo dita e tretë me radhë në të cilën Kosova regjistron numër katërshifror të të infektuarve.

Kjo ka bërë që numri i rasteve aktive më se të dyfishohet për një javë. Nga 4 mijë e 225, sa ishte të premten e kaluar, ka shkuar në 9 mijë e 230.

Instituti Kombëtar i Shëndetit Publik, ndërkohë, ka vazhduar me thirrjet për mbajtjen e maskës në ambiente të mbyllura dhe vaksinimin e qytetarëve. Sipas njoftimit të IKSHPK-së, Kosova mund të përballet edhe më tutje me rritje të numrit të rasteve me COVID-19.

“Me qëllim të përforcimit të imunitetit dhe parandalimit të rasteve të reja dhe formave të rënda të sëmundjes, qytetarët këshillohen që vaksinohen, me dozën e parë të dytë dhe të tretë mund të vaksinohen të gjithë personat e moshës mbi 12 vjeç; me dozën e katërt, mund të vaksinohen personat e moshës mbi 60 vjeç, me kusht që të kenë kaluar katër muaj nga marrja e dozës së tretë”, thuhet në apelin e IKSHPK-së.

E gjatë 24 orëve, 218 persona janë imunizuar me vaksinë anti-COVID.

Me rritjen e numrit të të infektuarve, është rritur edhe numri i të hospitalizuarve në QKUK e në spitale rajonale. 95 pacientë janë duke u trajtuar me Covid-19, sipas SHSKUK-së. Më së shumti pacientë ka në Klinikën Infektive, ku gjatë së premtes kanë marrë trajtim 25 persona.