Një ditë pasi emisari i posaçëm i Bashkimit Evropian për dialogun Miroslav Lajçak bëri të ditur se Kosova dhe Serbia janë vetëm “dy fjalë afër ose dy fjalë larg” finalizimit të marrëveshjes për të pagjeturit, kryeministri Albin Kurti ka thënë se termi “të zhdukur me dhunë” është dallimi i palëve.
Në një konferencë për media të mërkurën, Kurti ka thënë se palët s’janë shumë larg, por ka shtuar se Kosova është e kujdesshme për shkak të “përvojës së hidhur që ka me Beogradin”.
“Janë disa çështje që kanë ngelur pa dakordim. Do ta kisha theksuar një dallim kryesor që ekziston sa i përket emërtimit të persona me dhunë të zhdukur gjatë luftës. Beogradi insiston të quhen vetëm persona të pagjetur, ne kërkojmë që kjo të theksohet që është bërë me dhunë. Ata nuk janë persona që janë zhdukur nga vërshimet apo tërmetet. Ne kemi familjarë që e dinë se personi i caktuar, i uniformuar ose jo, ua mori djalin ose vajzën, babën ose nënën e kështu me radhë. Bëhet fjalë për kidnapime, rrëmbime që janë bërë me dhunë. Insistimi ynë është që të bëhet kjo. Natyrisht, se janë persona të pagjetur, por nuk mund të krahasohen me dikë që zhduket në mal gjatë hikingut. Këta persona mund të konsiderohen pjesë e gjenocidit serb në Kosovë. Ky është dallim konceptual të cilën do ta shohim a do arrijmë ta përmirësojmë”, ka thënë Kurti.
Në një intervistë për televizionin publik të martën, Lajçaku u shpreh se për marrëveshjen e të pagjeturve është dakorduar 99.5 për qind e tekstit, e se duhet vetëm vullneti politik. “Më e dukshme dhe më logjike, do të thosha se një rezultat pozitiv i takimit do të ishte marrëveshja për personat e zhdukur sepse është çështje kaq e dhimbshme për familjet e personave të zhdukur... Po punojmë në veçanti për këtë. Jemi dy fjalë afër ose larg marrëveshjes”, ka thënë ai duke shtuar se synon që nga takimet në nivelin e krerëve të shtetit të ketë vetëm përfundime me rezultate konkrete.
Kurti: Duhet të shtohet trysnia evropiane dhe amerikane ndaj Serbisë
Kryeministri Albin Kurti ka thënë se Evropa dhe Shtetet e Bashkuara të Amerikës duhet të rrisin trysninë ndaj Serbisë për t’i vënë sanksione Rusisë.
Sipas Kurtit, për shkak se Serbia nuk do ta sanksionojë Rusinë po e vonon edhe konsolidimin e brendshëm, si konstituimin e Kuvendit dhe Qeverinë pas zgjedhjeve të reja. Kurti thotë se Serbia nuk duhet të lejohet të ulet në tre-katër karrige.
“Arsyeja pse nuk ka takime nuk do të duhej të kërkohej në Prishtinë, por në Beograd. Faktori pse po i ikin bisedimeve, po vonojnë konstituimin e Kuvendit, po e vonojnë Qeverinë sepse nuk duan ta sanksionojnë Rusinë. Që nga 24 shkurti, në Serbi u rrit mbështetja popullore për Kremlinin në dëm të integrimeve evropiane. Janë duke u përpjekur ta vonojnë konsolidimin e Qeverisë për të vazhduar të ulen në tre-katër karrige. Ne duam dialog për marrëveshje, jo dialog për dialog. Kjo marrëveshje duhet ta ketë në qendër njohjen reciproke. E thotë SHBA-ja, Gjermania, Brukseli. Ne jemi të interesuar, aktiv, të përgjegjshëm. Çka do të ndodhë në të ardhmen nuk është në dorën tonë. Duhet të shtohet trysnia evropiane dhe amerikane ndaj Serbisë. Në luftën që po ndodh, s’mund të jesh neutral. Pengesat shtesë që na janë shtuar këtë vit kanë të bëjnë me Beogradin”, ka thënë Kurti në konferencë për media të mërkurën.
Për njohjen e mundshme nga Greqia, kryeministri Kurti ka thënë se po punojnë në këtë aspekt, por s'ka ende diçka konkrete.
© KOHA. Të gjitha të drejtat janë të rezervuara.
