1 perditesime
Arbëri

Të shtëna me armë në protestën e opozitës në Maqedoni

Të shtëna me armë në protestën e opozitës në Maqedoni
Foto: Ilustrim
21:39

Të shtëna me armë në protestën e opozitës në Maqedoni

Disa të shtëna me armë zjarri dhe gjuajtje të mjeteve të forta kanë shoqëruar protestës që po mbahet në Maqedoni të Veriut, ka njoftuar Alsat të mërkurën.

Protestuesit që janë duke protestuar tash e disa ditë para Qeverisë, kanë nisur të lëvizin drejt Ministrisë së Punëve të Jashtme, derisa me të arritur te shtatorja e Skënderbeut, janë përleshur me disa persona të tjerë.

Nuk dihen motivet e përleshjes, por tashmë situata duket se është qetësuar.

Mbështetës të partive opozitare po protestojnë për shkak të propozimit francez për zgjidhjen e kontestit gjuhësor e historik mes Shkupit e Sofjes.

Për këtë, Bullgaria edhe ka bllokuar nisjen e negociatave të Maqedonisë së Veriut për anëtarësim në BE.

21:19

Vazhdojnë tensionet me protestat në Shkup

Nën brohoritjet “Nëse miratoni propozimin francez do të digjeni në ferr”, pankarta e vendosur nga protestuesit para Kuvendit të Maqedonisë së Veriut është djegur nga vetë ata.

Në ditën e pestë të protestës në Shkup, mijëra qytetarë janë mbledhur të mërkurën para Qeverisë së Maqedonisë së Veriut për të protestuar kundër propozimit francez, përmes të cilit synohet të tejkalohen dallimet mes Shkupit dhe Sofjes.

Protestuesit nën moton “Ultimatum. Jo, faleminderit”, kanë kërkuar që Qeveria të hedh poshtë propozimin francez duke brohoritur “Dorëheqje” dhe “Ikni tradhtarë”.

Protestuesit, të cilët janë nisur nga objekti i ekzekutivit, kanë kaluar përmes Sheshit Skënderbe dhe janë ndalur para Ministrisë së Punëve të Jashtme, ku kanë gjuajtur gjësende të forta si dhe kanë brohoritur shprehje nacionaliste ndaj shqiptarëve.

Në gjithë Shkupin vërehet prani e shtuar e forcave speciale, veçanërisht para institucioneve shtetërore.

Të gjitha hyrje-daljet e rrugëve para Qeverisë, Ministrisë së Punëve të Jashtme dhe Kuvendit janë bllokuar një orë para fillimit të protestave.

Prania e shtuar e forcave policore vjen pasi të martën protestat eskaluan në dhunë dhe si rrjedhojë 47 policë mbetën të lënduar, dy nga të cilët në gjendje të rëndë.

Deri tani janë ndaluar 11 persona, dy prej të cilëve janë minoren.

Policia maqedonase ka bërë të ditur se po vazhdon identifikimi i personave të tjerë të cilët kanë qenë të përfshirë në demolimin e institucioneve të shtetit dhe kanë sulmuar policë.

Skenat e dhunshme gjatë ditës i kanë dënuar presidenti maqedonas, Stevo Pendarovski dhe ambasadori i Bashkimit Evropian në Shkup, David Geer.

Ndryshe partitë maqedonase në opozitë, VMRO DOMNE dhe Majta, janë kundër propozimit francez pas siç thonë nëse i njëjti nuk pëson ndryshime rrezikon gjuhën dhe identitetin maqedonas.

Përderisa partia e Kryeministrit të Maqedonisë së Veriut, Dimitar Kovaçevski dhe të gjitha partitë e tjera shqiptare në vend: Bashkimi Demokratik për Integrim, Lëvizja Besa dhe Alenca për Shqiptarët, mbrojnë qëndrimin se ky propozim garanton gjuhën dhe identitetin maqedonas, si dhe zhbllokon procesin e integrimeve. /REL