Eksperti i arsimit, Xhavit Rexhaj, ka thënë se arsimi në Kosovë është dëmtuar shumë pas luftës. Në “Java Sonte me Rronin”, ai ka numëruar tri pika ku sheh se ka ngecur arsimi në vend qe 23 vjet.
Rexhaj, i cili ka qenë edhe zëvendësministër i Arsimit, tha se politizimi, ekspertiza ndërkombëtare që i ka zbatuar reformat pa e njohur mentalitetin e njerëzve të Kosovës dhe mungesa e dijes në Kosovë, janë pikat kyçe që e kanë lënë pas përmirësimin e sistemit arsimor.
Ai tha se dy parti kanë qenë kryesore përgjegjëse për gjendjen në arsim.
“Një është politizimi i skajshëm, partitë në mënyrë të pashpirt dhe dy parti më shumë se të tjerat në mënyrë të pashpirt e kanë thithur kapacitetin e arsimit për t’i ushqyer militantët e tyre. E kanë thithur potencialin e arsimit si sektor shtetëror publik për t’i punësuar e rehatuar militantët e tyre, po e shtoj edhe LDK-në aty po i bëjmë tri. Partitë tona e kanë marrë arsimin si vend për t’i rehatuar militantët në të gjitha nivelet. Çdo kryetar komune atje (Kamenicë) pa përjashtim... LDK, PDK, AAK, sa kanë mundur kanë punësuar njerëz në arsim dhe është ngopë arsimi”.
Problemin e dytë, Rexhaj e sheh tek ekspertët e jashtëm të cilët thotë se kanë sjellë reforma që nuk i përshtaten Kosovës.
“E dyta, ka qenë ekspertët e jashtëm. Bolonja është implementuar dhe ka qenë një prej reformave që janë implementuar në Kosovë që kanë ardhur nga jashtë, ato tesha s’na kanë rënë. Arsimtarët, profesorët, pedagogët kosovarë janë gjetur në një situatë ku nuk janë ndjerë në shtëpi të vet me këto reforma”.
Përgjegjës janë edhe ekspertët vendorë, tha Rexhaj.
“E treta është mosdija e ekspertizës vendore. Është shumë e mirë kurrikula me kompetenca, por 10 vetë mirë në Kosovë nuk e njohin mirë atë dhe le më trajnerët që shkojnë gjoja i trajnojnë njerëzit. Sot ka ende probleme thelbësore me zbatimin e kurrikulave”.
© KOHA. Të gjitha të drejtat janë të rezervuara.
