Analisti gjerman Bodo Weber ka thënë se Përfaqësuesi Special i BE-së për dialogun Kosovë – Serbi, Mirosllav Lajçak, po duhet të simulojë se ekziston një dialog politik.
Weber ka thënë se është e vështirë të pritet ndonjë përparim në dialog, ndërsa ka thënë se është humbur një mundësi që ekzistonte vitin e kaluar.
“Në mungesë të ndonjë nisme të rëndësishme politike në nivelet më të larta në BE dhe SHBA, z. Lajçak nuk i mbetet zgjidhje tjetër veçse të simulojë ekzistencën e ndonjë dialogu politik. Përveç kësaj, nëse do të kishte iniciativa të tilla e vullnet të tillë politik në nivelin më të larta, z. Lajçak nuk do të ishte zgjedhur në postin e tij aktual”, tha Weber në një intervistë për “Kosovo Online”.
Weber thotë se tash gjithë prioriteti është në Ukrainë dhe luftën që po zhvillohet atje.
“Është e vështirë të presësh ndonjë përparim në dialog. Nevojitet një rivendosje thelbësore e negociatave. Kishte një shans vitin e kaluar, pra pas ardhjes së presidentit Biden në pushtet në SHBA dhe para largimit të kancelares gjermane Merkel nga pushteti, por nuk u shfrytëzua. Dhe tash, këtë vit, kur kemi një Qeveri të re gjermane që e ka shpallur Ballkanin Perëndimor si prioritet, gjithçka dominohet nga agresioni rus, pra pushtimi i Ukrainës”.
Weber në intervistë ka folur edhe për rrezikun e ndonjë destabilizimi eventual në Ballkanin Perëndimor, e po ashtu edhe për arritjen e ndonjë marrëveshje gjithpërfshirëse mes Kosovës e Serbisë.
“Përderisa marrëdhëniet Kosovë – Serbisë dhe ato brenda Kosovës, mes Prishtinës dhe serbëve të Kosovës nuk zgjidhen përgjithmonë, rritja e tensioneve nga ana e Beogradit, si dhe e Prishtinës, për fat të keq, do të mbetet pjesë e politikës së përditshme”, tha Weber.
E për çështjen e njohjes së Kosovës nga pesë shtetet anëtare të Bashkimit Evropian që ende nuk e kanë njohur atë, Weber ka thënë se kjo do të çonte drejt marrëveshjes përfundimtare mes Kosovës e Serbisë.
“Gjithmonë ka qenë e qartë se njohja e Kosovës nga pesë shtetet mosnjohëse që janë anëtare të BE-së do të çonte drejt një marrëveshjeje përfundimtare, gjithëpërfshirëse Kosovë – Serbi, e cila është konfirmuar edhe vitet e fundit nga vendet si shembull Spanja”, tha Weber.
© KOHA. Të gjitha të drejtat janë të rezervuara.
